
சென்னை முதல் பெங்களூரு வரை செல்லும் ஒரு ரயிலில் தற்செயலாக சந்திக்கும் பூமிநாதன், சூர்யா மற்றும் சந்துரு ஆகிய மூன்று மனிதர்களின் பயணமும், அவர்கள் தங்களது திருமணத்திற்கு முந்தைய காதல்களைப் பற்றிப் பகிர்ந்து கொள்வதும்தான் டைட்டானிக் படம் சொல்ல வருகிறது.. சூர்யா கொடைக்கானலில் தன் காதலியுடன் ஏற்பட்ட கருத்து வேறுபாடுகளையும் பிரிவையும் பகிர்ந்துகொள்ள, பூமி தான் கொண்ட ஒருதலைக் காதலைப் பற்றி சொல்ல, மற்றொருவரான சந்துரு தனது முந்தைய காதலைப் பற்றிய உண்மையை வரவிருக்கும் தன் மனைவி தீபாவிடம் சொல்வதா வேண்டாமா என்ற குழப்பத்தில் இருக்க, இதற்கு என்ன தீர்வு கிடைக்கிறது என்பது மீதிக்கதை.
பூமிநாதன் கதாபாத்திரத்தில் நடித்துள்ள காளி வெங்கட் இதுவரை தான் ஏற்காத ஒரு முற்றிலும் மாறுபட்ட தோற்றத்திலும் நடிப்பிலும் வந்து ரசிகர்களின் கவனத்தை ஈர்க்கிறார். சூர்யாவாக வரும் கலையரசன் மற்றும் பிற கதாபாத்திரங்களில் நடித்துள்ள ராகவ் விஜய், ஆஷ்னா சாவேரி ஆகியோர் தங்களது இயல்பான மற்றும் நகைச்சுவையான நடிப்பின் மூலம் படத்திற்கு பலம் சேர்த்துள்ளனர். குறிப்பாக, கயல் ஆனந்தி இந்தப் படத்தில் ஒரு துடிப்பான மற்றும் மிக முக்கியமான கதாபாத்திரத்தை ஏற்று மிகவும் கச்சிதமாக நடித்து அனைவரையும் கவர்ந்துள்ளார்.
கதையில் வரும் ஒவ்வொரு கதாபாத்திரத்திற்கும் உரிய முக்கியத்துவம் அளிக்கப்பட்டு பார்வையாளர்களைச் சிரிக்க வைக்கும் வகையில் அமைந்துள்ளதால், தனித்துவமான வில்லன் பாத்திரங்கள் என்றில்லாமல் மனித மனங்களின் உணர்வுப் போராட்டங்களும் குழப்பங்களும் இக்கதையில் சிறப்பாகக் கையாளப்பட்டுள்ளன.
நிவாஸ் கே. பிரசன்னா இசையில் பாடல்கள் நல்ல வரவேற்பைப் பெற்றுள்ளன. மேலும், படத்தில் நகைச்சுவைக் காட்சிகளையும் கலகலப்பான சூழலையும் உயிர்ப்புடன் வைத்திருக்கத் தனது பின்னணி இசையின் (BGM) மூலம் இசையமைப்பாளர் கடுமையாக உழைத்துப் படத்திற்குப் பலம் சேர்த்துள்ளார்.
சென்னை – பெங்களூரு ரயில் பயணக் காட்சிகள், கொடைக்கானலின் ரம்மியமான இயற்கை எழில் கொஞ்சும் பின்னணி மற்றும் கோயம்புத்தூர் புறநகர்ப் பகுதிகளின் கிராமியச் சூழல் ஆகியவற்றைத் தனது கலர்ஃபுல் ஒளிப்பதிவின் மூலம் மிகவும் அழகாகக் காட்சிப்படுத்தியுள்ளார் ஒளிப்பதிவாளர் பல்லு..
இயக்குநர் ஜானகிராமன் படத்தின் திரைக்கதையை அமைத்த விதத்தில், ரயிலில் தொடங்கும் உரையாடல்களையும் அதன் ஊடாக விரியும் பிளாஷ்பேக் காட்சிகளையும் சுவாரஸ்யமாக இணைத்து எந்த இடத்திலும் தொய்வில்லாமல் கொண்டு சென்றது இயக்குநரின் பிளஸ் ஆகும். படத்தில் உள்ள நகைச்சுவையும் எதிர்பாராத திருப்பங்களும் ரசிகர்களைக் கவர்ந்தாலும், வழக்கமான காதல் கதைகளின் சாயல் சற்றுத் தெரிவது சிலருக்கு மைனஸாகத் தோன்றலாம். காதலின் சிக்கல்களையும் திருமணத்திற்கு முந்தைய குழப்பங்களையும் நகைச்சுவையுடன் சொல்வதால் இளைஞர்கள் முதல் குடும்பங்கள் வரை அனைத்துத் தரப்பு ரசிகர்களையும் இந்தப்படம் கவரும் என்பதில் சந்தேகம் இல்லை.









