ஒரே நாளில், ஒரே இரவில் நடப்பது போன்ற கதைகள் நிறைய வருகின்றன. அதில் என்ன வித்தியாசப்படுத்தி விறுவிறுப்பாக காட்டுகிறோம் என்பதில் தான் படத்தின் வெற்றி அடங்கி இருக்கிறது. இந்த டென் ஹவர்ஸ் படமும் அப்படி ஒரு கதை தான்.. இந்தப்படம் வெற்றிக்கோட்டை தொட்டிருக்கிறதா பார்க்கலாம்.
சென்னையிலிருந்து கோயம்புத்தூருக்கு ஆம்னி பஸ் ஒன்று இரவு நேரம் புறப்பட்டுகிறது.. பஸ் சேலத்தை நெருங்கும்போது பேருந்தில் ஒரு பெண் சித்தரவதை செய்யப்படுகிறார் என்று போலீஸுக்கு ஒரு போன் வருகிறது.
அப்போதுதான் சபரிமலைக்கு கிளம்பு தயாராக இருக்கும் அந்த ஏரியா போலீஸ் இன்ஸ்பெக்டர் சிபிராஜ், கிளம்பிச்சென்று அந்த பேருந்தை நிறுத்தி சோதனை செய்கிறார். அப்போது அங்கு தகவல் கொடுத்த இளைஞரே கொலை செய்யப்பட்டிருப்பது கண்டு அதிர்ச்சி அடைகிறார். .
அதனைத் தொடர்ந்து, பேருந்தில் இருந்த பயணிகள் அனைவரையும் காவல் நிலையத்திற்கு அழைத்துச் சென்று விசாரணையை துவங்குகிறார் சிபிராஜ். இறுதியில் கொலையை செய்தது யார் என்பதை சிபிராஜ் கண்டுபிடித்தாரா இல்லையா என்பதே படத்தின் மீதிக்கதை..
கதையின் நாயகனாக சிபிராஜ். அசத்தலாக நடித்துள்ளார்..சபரிமலை அய்யப்ப பக்தராக வரும் அவரது தோற்றமும் உடல்மொழியும் அவரது கேரக்டரை அபாரமாக உயர்த்தியுள்ளது. கதாநாயகி மற்றும் வழக்கமான பொழுதுபோக்கு அம்சங்கள் இல்லாத குறையைத் தனி ஆளாக நிவர்த்தி செய்து படத்தை இரசிக்க வைத்திருக்கிறார் நிச்சயமாக சிபிராஜுக்கு இந்தப்படம் ஒரு திருப்புமுனையாக இருக்கும்.
கஜராஜ், ஜீவா ரவி, ராஜ் அய்யப்பா, முருகதாஸ், திலீப்பான் – அனைவரும் தங்கள் பகுதிகளை நன்கு நிறைவேற்றியுள்ளனர். குறிப்பாக திலீபன் மிகச்சிறிய வேடமாக இருந்தாலும், முக்கியமான தாக்கத்தை ஏற்படுத்துகிறார்.
கதை முழுவதும் இரவில் நடந்தாலும், இரவு நேரக் காட்சிகளை மிக நேர்த்தியாக படமாக்கியிருக்கும் ஒளிப்பதிவாளர் ஜெய் கார்த்திக், பேருந்து பயணம், தேசிய நெடுஞ்சாலை என அனைத்து காட்சிகளையும் குறைவான வெளிச்சத்தில் மிக சிறப்பாக படமாக்கியிருக்கிறார்.
இசையமைப்பாளர் கே.எஸ்.சுந்தரமூர்த்தியின் பின்னணி இசை ஆரம்பத்திலேயே திரைக்கதையோடு பார்வையாளர்களை ஒன்றிவிட செய்துவிடுகிறது.
எங்கோ ஒரு இளம்பெண் கடத்தப்பட்டதற்கும், ஏதோ ஒரு பேருந்தில் பயணிக்கும் பயணியின் கொலைக்கும் உள்ள தொடர்பை சுவாரசியமாகப் படமாக்க இயக்குநர் இளையராஜா கலியபெருமாள் முயற்சி செய்திருக்கிறார். குறிப்பாக அனைத்து பயணிகளும் காவல் நிலையத்திற்கு அழைத்து வரப்பட்டு, ஒவ்வொருவராக விசாரித்து ஒவ்வொரு முடிச்சையும் அவிழ்க்கும் போது, ஒரு தீவிரமான குற்ற-திரில்லராக அனைத்து கேள்விகளுக்கும் ஒரே இரவில் விடை சொல்லும் விதமாக திரைகதையை உருவாக்கி இருப்பது சுவாரஸ்யம் அழைக்கிறது.
குறை சொல்ல முடியாத ஒரு விறுவிறுப்பான க்ரைம் திரில்லர்தான் இந்த ‘டென் ஹவர்ஸ்’.. ரசிகர்கள் தாரளமாக இந்தபடத்திற்கு டிக்கெட் போடலாம்.
