சிறுவயதில் தன் தந்தையின் கடுமையான கட்டுப்பாடுகளாலும் மன உளைச்சலாலும் பாதிக்கப்பட்டு வளர்ந்த சந்துரு, கேரளாவின் காடம்புழா பகுதியில் காவல் உதவி ஆய்வாளராக பணியாற்றி வருகிறார். அங்குள்ள ஏரி ஒன்றில் அடையாளம் தெரியாத சிறுவன் ஒருவனின் சடலம் கண்டெடுக்கப்படுவதிலிருந்து இக்கதை தொடங்குகிறது.
மறுபுறம், தமிழகத்தின் குறிஞ்சிமேடு பகுதிக்குப் புதிதாகக் குடியேறும் தர்ஷனா என்ற விதவைப் பெண்ணின் எட்டு வயது மகன் ஹிருதய் திடீரெனக் காணாமல் போகிறான். அந்த வழக்கை தமிழக காவல் ஆய்வாளர் சஞ்சனா நடராஜன் விசாரிக்கத் தொடங்க, காடம்புழாவில் கண்டெடுக்கப்பட்ட சடலத்திற்கும் காணாமல் போன சிறுவனுக்கும் இடையிலான தொடர்புகளை சந்துருவும் சஞ்சனாவும் இணைந்து கண்டறிவதும், தனது தந்தையின் நிழலிலிருந்து விடுபட்டு சந்துரு தன்னை ஒரு சிறந்த அதிகாரியாக நிரூபிப்பதுமே ‘ஜான் டோ’ படத்தின் கதைச்சுருக்கம்.
.
காவல் அதிகாரி சந்துருவாக நடித்துள்ள அர்ஜுன் தாஸ் தனது தனித்துவமான குரலாலும், கதாபாத்திரத்தின் உள்ளார்ந்த பதற்றம் மற்றும் உறுதியாலும் படத்திற்கு மிகப்பெரிய பலமாக அமைந்துள்ளார். வழக்கமான அதிரடி போலீஸ் அதிகாரியாக இல்லாமல், தன் தந்தையின் குரல் தன்னைத் துரத்தும் மனப்போராட்டத்தை மிக இயல்பாக வெளிப்படுத்தியுள்ளார்.
தமிழக காவல் ஆய்வாளராக நடித்துள்ள சஞ்சனா நடராஜன், கறாரான மற்றும் நிதானமான அதிகாரியாக அர்ஜுன் தாஸின் கதாபாத்திரத்திற்கு நேர்மாறான சிறப்பான நடிப்பை வழங்கி, இருவருக்கும் இடையிலான விசாரணைக் காட்சிகளுக்குப் பலம் சேர்த்துள்ளார்.
குணச்சித்திர மற்றும் எதிர்மறைக் கதாபாத்திரங்களில், சந்துருவின் கடுமையான தந்தையாக நடித்துள்ள படவா கோபி மிகச் சரியான தேர்வாக அமைந்துள்ளார்; அவர் இறந்த பிறகும் அவரது குரல் சந்துருவின் மனதில் ஒரு கதாபாத்திரமாகவே ஒலிப்பது சிறப்பாகக் கையாளப்பட்டுள்ளது.
தாயாக சிருஷ்டி யாதவ், சிறுவன் ஹிருதயாக நிரவ் எஸ், மகள் லக்கியாக ஜாரா வினீத் சந்தோக் மற்றும் அனுபமா குமார், அர்ச்சனா சந்தோக், கார்த்திக் குமார் ஆகியோர் தங்கள் பாத்திரங்களுக்குத் தேவையான உணர்வுப்பூர்வமான நடிப்பைக் கொடுத்துள்ளனர்.
.
படத்தின் ஒளிப்பதிவாளர் ப்ரீத்தா ஜெயராமன் மலைப்பிரதேசங்களின் சூழலையும், புலனாய்வுத் திரைப்படத்திற்குத் தேவையான மர்மமான காட்சியமைப்புகளையும் நேர்த்தியாகப் படமாக்கியுள்ளார். இசையமைப்பாளர் முஜீப் மஜீத் தனது பின்னணி இசையின் மூலம் விசாரணைக் காட்சிகளில் பதற்றத்தையும் உணர்வுப்பூர்வமான தருணங்களில் ஆழத்தையும் கூட்டியுள்ளார்.
இயக்குநர் மதுமிதா, ஒரு கொலையாளி யார் என்பதைத் தேடும் வழக்கமான த்ரில்லர் கதையாக மட்டும் இதை அணுகாமல், கதாபாத்திரங்களின் உளவியல் சிக்கல்களையும், பெற்றோர் – பிள்ளை உறவின் நுணுக்கங்களையும் மிக உணர்வுப்பூர்வமாகப் பதிவு செய்திருப்பது அவருடைய திறமைக்குச் சான்றாகவும் படத்தின் பெரிய பிளஸ்ஸாகவும் அமைந்துள்ளது.
ஒரு த்ரில்லர் பட ரசிகரால் இடைவேளைக்கு முன்பே திருப்பத்தையும் குற்றவாளியையும் எளிதில் யூகிக்க முடிவதும், குற்றவாளியை மறைக்கப் பெரிய முயற்சி எடுக்காததும் திரைக்கதையின் பலவீனமாக அமைந்துள்ளது. வெறும் கிளைமாக்ஸ் திருப்பங்களை மட்டுமே எதிர்பார்க்காமல், ஆழமான கதாபாத்திர வடிவமைப்பு, உளவியல் ரீதியான அணுகுமுறை மற்றும் உணர்வுப்பூர்வமான விசாரணை த்ரில்லர் படங்களை விரும்புபவர்களுக்கு இந்தப் படம் நிச்சயம் பிடிக்கும்.
