சிறு வயதில் இருந்தே நாயகன் சரவண விக்ரமிற்கு பெண்களிடம் பேசுவது என்றால் ஒருவித பயம்.. பெண்களிடம் அவருக்கு இருக்கும் பயத்தை போக்குவதற்காக அவரது நண்பர் பாலியல் தொழிலாளியான நாயகி ஹஸ்லி அமானை அறிமுகப்படுத்துகிறார். அவரை பார்த்ததும் நாயகனுக்கு அவர் மீது ஒருவித ஈர்ப்பு ஏற்பட, அவருடன் ஒருநாள் முழுவதும் செலவிட விரும்புகிறார்.
ஹஸ்லி அமானும் சம்மதிக்க, இருவரும் சேர்ந்து தங்களது ஒருநாள் பயணத்தை தொடங்குகிறார்கள். ஆனால் ஹஸ்லி அமானை தாதாவான ராஜேஷ் பாலசந்திரன் ஒருபுறம் தேடி அலைகிறார். இன்னொரு புறம் போலீஸ் அதிகாரி தன் துப்பாக்கியை ஹஸ்லி திருடி சென்றுவிட்டதாக தேடி வருகிறார்.
இந்த இரண்டையும் ஒரே நேரத்தில் ஹஸ்லி எப்படி ஹேண்டில் செய்கிறார். அந்த கும்பல் ஹஸ்லியை துரத்துவதற்கான காரணம் என்ன? என்ற கேள்விகளுக்கெல்லாம் பதில் சொல்கிறாள் ‘டியர் ரதி
நடிகர் சரவணா விக்ரம் ஆரம்பத்தில் கதாபாத்திரத்திற்கு பொருந்தாதது போல் தோன்றினாலும்… தன்னுடைய பக்குவப்பட்ட நடிப்பின் மூலம் ரசிகர்களின் மனதை எளிதாக கவர்ந்து விடுகிறார்
பாலியல் தொழிலாளி பாத்திரத்தில் டைட்டில் ரோலில் நடித்திருக்கும் ஹஸ்லி அமான், தயக்கமின்றி அந்த பாத்திரத்தில் நடித்திருப்பதற்கு பாராட்டலாம். நடிப்பும் அவருக்கு எளிதாக வருகிறது.
காமெடி கலந்த வில்லன் வரதனாக ராஜேஷ் பாலச்சந்திரன் நடித்திருக்கிறார். சாய் தினேஷ் பத்ராம் மற்றும் ஷெரிப் கதாபாத்திரத்தில் நடித்திருக்கும் யுவராஜ் சுப்பிரமணியம் ஆகியோர் புதியவர்களாக இருந்தாலும், தங்கள் மீது கவனம் ஈர்க்க முயற்சித்திருக்கிறார்கள்
லோகேஷ் இளங்கோவனின் ஒளிப்பதிவில் காட்சிகள் ரசனை. எம்.எஸ்.ஜோன்ஸ் ரூபர்ட் இசை பாடல்களில் ஓகே ரகம். ஆனால் திரைக்கதைக்கேற்ப பின்னணி இசைத்திருக்கிறார்.
காதல், காமம் இரண்டை மையமாக வைத்து படத்தை இயக்கியிருக்கிறார் இயக்குனர் பிரவீன் கே.மணி. அதேசமயம் அன்புக்கும், காதலுக்கும் இடையேயான வித்தியாசத்தை சொல்ல முயற்சித்திருக்கும் இயக்குநர் பாலியல் தொழிலாளிகளுக்கு கௌரவம் சேர்க்க முயற்சித்திருக்கிறார்.ஆனால் திரைகதையில் தடுமாறி இருப்பதால் சொல்லவந்ததை சரியாக சொல்லாமல் விட்டிருக்கிறார்.. .
