காவலர்களிடமிருந்து உயிருடன் தப்பிக்க ரங்கராய சக்திவேல் அமரனைக் கேடயமாகப் பயன்படுத்திக் கொள்கிறார். அதற்கு நன்றிக்கடனாக அமரனைத் தனது மகன் போல் வளர்க்கிறார். அமரன் பெரியவன் ஆனதும், சக்திவேல் தப்பிப்பதற்காக வேண்டுமென்றே தனது தந்தையைத் கொன்றதாக அறிந்து கொள்கிறான் அமரன். அமரன், சுடப்பட்ட சக்திவேலை நேபாளத்தின் பனிப் பள்ளத்தாக்குகளில் தள்ளிவிடுகிறான். ஆனால் இரண்டு வருடங்களுக்குப் பிறகு உயிருடன் திரும்பும் அஞ்சானான சக்திவேல் ரங்கராயன் துரோகிகளைப் பழிவாங்குவதுதான் படத்தின் கதை.
கதையின் நாயகன் ரங்கராய சக்திவேலாக கமல்ஹாசன் நடித்திருக்கிறார். எந்த கதாபாத்திரத்தைக் கொடுத்தாலும் அந்த கதாபாத்திரமாகவே மாறி, தனித்தன்மையோடு சிறந்த நடிப்பை வெளிப்படுத்தும் கமல்ஹாசன் இந்த படத்திலும் ரங்கராய சக்திவேலாக வலம் வருவதற்கு நிறைய உழைப்பைப் போட்டிருக்கிறார். மூன்று காலகட்டங்களில் வித்தியாசமான மூன்று கெட்டப்களில் வரும் அவர், உடல்மொழி, வசன உச்சரிப்பு ஆகியவற்றிலும் வேறுபாடு காட்டி மிரட்டியிருக்கிறார்
கமல்ஹாசனால் வளர்க்கப்படும் சிலம்பரசனுக்கு போட்டி போட்டு நடக்க கூடிய வாய்ப்புகள் எதுவும் அமையவில்லை. மாறாக ஆக்ஷன், திரிஷாவுடன் ஒன்சைடு ரொமான்ஸ் என்று தனது வேலையை சரியாக செய்திருக்கிறார்.
திரிஷாவின் கதாபாத்திரம் மிகவும் வித்தியாசமாக அமைந்திருக்கிறது. பல சர்ச்சைகளையும் சலசலப்புகளையும் விவாதங்களையும் இவரது கதாபாத்திரம் ஏற்படுத்தும் என்பது உறுதி.
கமலின் மனைவி ஜீவாவாக அபிராமி. கணவனின் நடந்தையின் மேல் கோபம் இருந்தாலும், அதை மறந்து சகஜமாக மாறும் சுபாவத்துடன் கலகலப்புடன் இருப்பது, அதன் பின் மறதி நோயால் அவதிப்படும் இடங்களில் நன்றாக ஸ்கோர் செய்கிறார்.
இரண்டு காட்சிகள் என்றாலும் கண்கலங்க வைத்து விட்டார் ஐஸ்வர்யா லெட்சுமி. அசோக் செல்வனின் கதாபாத்திரம் படத்தில் எந்த வித பாதிப்பையும் ஏற்படுத்தவில்லை.
ஏ.ஆர்.ரஹ்மான் இசையில் “ஜிங்குஜா ஜிங்குஜா…” பாடல் மட்டுமே ஆட்டம் போட வைப்பதோடு முணுமுணுக்க வைக்கிறது. மற்ற பாடல்களை செவி கூட சேர்க்க மறுக்கிறது.
ஒளிப்பதிவாளர் ரவி கே.சந்திரன் மற்றும் அவரது குழுவினர் கடுமையாக உழைத்திருப்பது திரையில் தெரிகிறது. குறிப்பாக கார் சேசிங் காட்சிகள் மிரட்டலாக இருக்கிறது. ஸ்டண்ட் இயக்குநரும் பாராட்டுக்குரியவர்.
நம்பிக்கை துரோகத்தைச் சொல்லும் வழக்கமான கேங்ஸ்டர் கதையாக, பல பழைய கேங்ஸ்டர் கதைகளின் தொகுப்பாக இருப்பது ஏமாற்றம் அளிப்பதாக உள்ளது. கமல்ஹாசன் மற்றும் சிலம்பரசன் இருவரை தவிர படத்தில் நடித்திருக்கும் எந்த நடிகர்களும், எத்தகைய பாதிப்பையும் ஏற்படுத்தாதது படத்தின் மிகப்பெரிய பலவீனம். ஆளுமையான நட்சத்திரங்கள் இருந்தும் அழுத்தமில்லாத திரைக்கதை அமைப்பில் படத்தை இயக்கியுள்ளார் இயக்குனர் மணி ரத்னம்
