சென்னை ராயபுரத்தின் பின்னணியில், கானா இசைக்கலைஞர்களான தாஸ் மற்றும் லட்சுமி ஆகியோரின் ரெட்ரோ பாணி வாழ்க்கையோடு தொடங்குகிறது. பாரம்பரிய இசைப் பின்னணி கொண்ட ஒரு நபர், கானா கலைஞருக்கு கிடைக்க வேண்டிய ஒரு இசை வாய்ப்பைத் தட்டிப்பறிப்பதில் இருந்து இவர்களது போராட்டம் ஆரம்பமாகிறது. காலப்போக்கில் இவர்களது வாரிசுகளான சிவா மற்றும் ஜீவா ஆகியோர் இந்தத் நவீன உலகிலும், இசைத்துறையிலும் தடம் பதிக்க எப்படிப் போராடுகிறார்கள், வர்க்க மற்றும் சாதிய பாகுபாடுகளைக் கடந்து கானா இசையை எப்படி உலகறியச் செய்கிறார்கள் என்பதே இந்தத் திரைப்படத்தின்கதை
ஹிப்ஹாப் தமிழா ஆதி இப்படத்தில் தாஸ், டைகர் சிவா, ஜீவா என மூன்று விதமான கதாபாத்திரங்களில் அவதாரமெடுத்துள்ளார். தனது வழக்கமான எனர்ஜியுடன் அவர் நடித்திருந்தாலும், மூன்று கதாபாத்திரங்களுக்கும் பெரிய அளவில் ஒப்பனை வேறுபாடுகள் இல்லாததால் பார்ப்பவர்களுக்குச் சற்றே குழப்பத்தை ஏற்படுத்துகிறது.
படத்தின் மற்றொரு பெரிய பலமாக அமைந்திருப்பது நடிகர் கருணாஸின் நடிப்புதான். நிறைவேறாத ஆசைகள் கொண்ட ஒரு தந்தையாக, மகனுடனான பாசப் பிணைப்பைக் காட்டும் ஒரு குறிப்பிட்ட உணர்வுப்பூர்வமான காட்சியில் அவர் காட்டியுள்ள அமைதியும் நடிப்பும் தியேட்டரில் கைதட்டல் பெறுகிறது.
நாயகியாக வரும் கெத்திகா சர்மா, சைத்ரா ஜே ஆச்சார், ரம்யா ரங்கநாதன், நாசர் மற்றும் பாபா பாஸ்கர் ஆகியோர் தங்களுக்குக் கொடுக்கப்பட்ட கதாபாத்திரங்களை நேர்த்தியாகச் செய்துள்ளனர். குறிப்பாக பாபா பாஸ்கர் இன்றைய தலைமுறை ஆன்லைன் கலாச்சாரத்தைப் புரிந்து கொள்ளத் திணறும் ஒரு எளிய தந்தையாக சில நகைச்சுவையான வசனங்கள் மூலம் ரசிக்க வைக்கிறார்.
இப்படத்திற்கு ஹிப்ஹாப் தமிழா ஆதியே இசையமைத்துள்ளார். பாடலாசிரியராகவும் அவரே துள்ளலான கானா மற்றும் பப்ளிக்கான பாடல்களைக் கொடுத்து ரசிகர்களைத் திரையரங்கில் ஆட வைத்துள்ளார். படத்திற்குப் பாடல்களும் பின்னணி இசையும் பலமாக இருந்தாலும், சில இடங்களில் அவை கதையின் உணர்வை விட இசையின் சத்தமே மேலோங்கி நிற்கிறது.
சென்னையின் பழம்பெரும் ராயபுரம் பகுதிகளையும், தற்கால நகர்ப்புறச் சூழலையும் அதன் இயல்பு மாறாமல் வண்ணமயமாகப் படம்பிடித்துள்ளார் ஒளிப்பதிவாளர்.
இயக்குநராக ஹிப்ஹாப் தமிழா ஆதி, இசைத்துறையில் தொழில்நுட்ப வளர்ச்சிக்கு முன்பிருந்த வர்க்கப் பாகுபாடுகள் மற்றும் நெப்போடிசம் (வாரிசு அரசியல்) போன்ற மிக முக்கியமான சமூகப் பிரச்சினைகளைத் தொட்டதற்காகப் பாராட்டப்பட வேண்டியவர். கர்நாடக இசை மட்டுமே கொண்டாடப்படும் ஓர் உயர்சாதி குடும்பத்தின் மத்தியில், ஒரு சிறுவன் கானா பாடலைத் துணிச்சலாகப் பாடும் காட்சியை அவர் இயக்கிய விதம் அவரது சாமர்த்தியத்தைக் காட்டுகிறது.
இருப்பினும் ஒரே படத்தில் பல சமூகக் கருத்துக்களைச் சொல்ல ஆசைப்பட்டு, படத்தின் மையக்கதையைத் திசைதிருப்பியது எல்லாக் காட்சிகளையும் ‘கனவுகள் நனவாகும்’ என்ற ஒற்றைப் பாணியிலேயே கொண்டு சென்றிருப்பது ஆகியவை பலவீனம். வலுவான அடித்தளம் கொண்ட ஒரு சமூகக் கருவை எடுத்துக்கொண்ட ஆதி, திரைக்கதையில் இன்னும் கொஞ்சம் ஆழமான பிடிமானத்தையும் சுவாரசியத்தையும் காட்டியிருந்தால், இன்னும் கம்பீரமாக மூசியை முறுக்கி இருக்கலாம்.
