சென்னையில் ஆங்காங்கே சமவயதிலான இளம் ஆண்களும் பெண்களும் தொடர்ச்சியாக படுகொலை செய்யப்பட்டு எரிக்கப்படுகிறார்கள். அதேசமயம் சில நிதி நிறுவனங்களைக் குறிவைத்து ஒரு கும்பல் கொள்ளையடித்து வருகிறது. மாநகர மக்களைப் பதற வைக்கும் இக்குற்றச் சம்பவங்களால் டென்ஷன் ஆகும் போலீஸ் கமிஷனர் ஆடுகளம் நரேன், ’சீரியல் கில்லர்’ பற்றி விசாரிக்கும் பொறுப்பை அசிஸ்டண்ட் கமிஷனர் ஷஷாங்கிடமும், கொள்ளைக் கும்பல் பற்றி விசாரிக்கும் பொறுப்பை அசிஸ்டண்ட் கமிஷனர் நவீன் சந்திராவிடமும் ஒப்படைக்கிறார்.
நவீன் சந்திரா வழக்கை விசாரிக்க தொடங்கிய உடன் அவருக்கு ஒரு துப்பு கிடைக்கிறது. அதை வைத்து கொலை செய்யப்பட்டவர்கள் யார்? என்பதை கண்டுபிடிப்பவர், கொலையாளி யார்? என்பதை எப்படி கண்டுபிடிக்கிறார் ?, எதற்காக இத்தனை கொலைகள் ? ஆகிய கேள்விகளுக்கான விடையை சுவாரஸ்யமான திரைக்கதையோடும், எதிர்பார்க்காத திருப்பங்களோடும் சொல்வதே ‘லெவன்’.
விரைப்பான போலீஸ் அதிகாரி வேடத்திற்கு நாயகன் நவீன் சந்திரா கச்சிதமாக பொருந்துகிறார். அவரது கடுகடு முகமும் உடல் மொழியும் போலீஸ் அதிகாரி வேடத்திற்கு நன்கு ஒத்துப் போகிறது.
இரட்டையர்கள் சம்பந்தப்பட்ட கதைக்களம் என்பதால் பாதிக்கப்படும் நபர்களாக வரும் நாயகி சஞ்சனாவாக தயாரிப்பாளர் ரேயா ஹரி, தாராவாக ரித்விகா, தீரனாக அர்ஜய் என்று படத்தில் முக்கிய காட்சிகளுக்கு துணை நிற்கின்றனர்.
பள்ளியின் தலைமை ஆசிரியையாக நடித்திருக்கும் அபிராமி, உயர் போலீஸ் ஆணையர் சந்திரசேகராக ஆடுகளம் நரேன்,எஸ் ஐ மனோகராக திலீபன், போலீஸ் அதிகாரியாக ஷஷாங்க் மிடுக்கான தோற்றத்துடம் தடம் பதித்துள்ளனர்.
கார்த்திக் அசோகனின் ஒளிப்பதிவு படத்துக்கு பக்க பலமாய் அமைந்திருக்கிறது.. டிமானின் பின்னணி இசை படத்துக்கு உயிரோட்டம் என்று சொன்னால் மிகையாகாது.
இரட்டையர்களை குறிவைக்கும் தொடர்ச்சியான கொலைகள் குழந்தை பருவ அதிர்ச்சி பின்னணி சம்பவங்களை கொண்ட பழிவாங்கும் சைக்கோ கொலைகாரணை கண்டுபிடிக்க புலனாய்வு செய்யும் காவல்துறை என்ற கதைக்களத்தை வித்தியாசமான கோணத்தில் யாராலும் யூகிக்க முடியாத புதுமையான அம்சங்களை உள்ளடக்கி, சுவாரஸ்யமான, விறுவிறுப்பான படமாக இதைக் கொடுத்திருக்கிறார் இயக்குநர் லோகேஷ் அஜில்ஸ். ஒரு இடத்தில் கொலையாளி யார்? என்ற சஸ்பென்ஸை உடைப்பவர், அடுத்த சில நிமிடங்களில் அதிலும் ஒரு திருப்பத்தை வைத்து பார்வையாளர்களை சீட் நுணியில் உட்கார வைத்து விடுகிறார்
