விஜய் சேதுபதியின் மகன் சூர்யா சேதுபதி நாயகனாக அறிமுகமாகி இருக்கும் திரைப்படம் இது. பிரபல ஸ்டண்ட் மாஸ்டராக திரையுலகில் தனக்கென ஒரு தனி இடத்தை தக்க வைத்திருக்கும் அனல் அரசு முதன்முதலாக இயக்குநராக அறிமுகமாகி இருக்கும் படமும் கூட.
சென்னையில் சிட்டிங் எம் எல் ஏ-வாக இருக்கும் சம்பத் ராஜ் அவர்களை கொடூரமாக கொலை செய்த குற்றத்திற்காக கைது செய்யப்படுகிறார் சூர்யா சேதுபதி. நீதிமன்ற காவலில் அடைக்கப்படுகிறார் சூர்யா சேதுபதி. எம் எல் ஏ-வின் மனைவியான வரலட்சுமி சரத்குமார், தனது ஆட்களை சிறைக்குள் அனுப்பி சூர்யாவை கொலை செய்ய திட்டமிடுகிறார்..
அவரது திட்டத்தை தகர்த்தெரிகிறார் சூர்யா விஜய்சேதுபதி. சிறுவன் என்று சாதாரணமாக நினைத்த சூர்யாவின் அதிரடியை பார்த்து மிரண்டு போகும் வில்லன் கோஷ்ட்டி, அவரை கொலை செய்ய அடுத்தடுத்த திட்டத்தை அரங்கேற்றுகிறது, அவற்றில் இருந்து சூர்யா விஜய்சேதுபதி எப்படி தப்பித்து தன்னை வீழானாக நிரூபிக்கிறார் என்பதே ‘பீனிக்ஸ்’.
சூர்யா சேதுபதி. தீர்க்கமான கோப பார்வை, எம்எம்ஏ விளையாட்டு வீரருக்கான உடலமைப்பு, அதிரடி ஆக்ஷன் என்று முதல் பாதி வசனம் குறைவாகவும் சண்டைக் காட்சிகள் அதிகமாகவும் இருக்க, இரண்டாம் பாதியில் ஃபிளாஸ்பேக்கில் விரியும் கதைக்களத்திற்கு தன் அண்ணனின் சாவிற்கு பழி தீர்க்கும் தம்பியாக களமிறங்கி அழுத்தமான நடிப்பை வெளிப்படுத்தியிருக்கிறார்.
வில்லனாக எம்.எல்.ஏ கதாபாத்திரத்தில் நடித்திருக்கும் சம்பத் ராஜ், எம்.எல்.ஏ மனைவியாக நடித்திருக்கும் வரலட்சுமி சரத்குமார், நாயகனின் அம்மாவாக நடித்திருக்கும் தேவதர்ஷினி, நாயகனின் அண்ணனாக நடித்திருக்கும் ‘காக்கா முட்டை’ விக்னேஷ், அபி நட்சத்திரா, வர்ஷா, முத்துக்குமார், திலீபன், அஜய் கோஷ், ஹரிஷ் உத்தமன், மூணாறு ரவி, நவீன், காயத்ரி, அட்டி ரிஷி என மற்ற வேடங்களில் நடித்திருப்பவர்கள் திரைக்கதை ஓட்டத்திற்கு பலம் சேர்க்கும் வகையில் நடித்திருக்கிறார்கள்.
ஒளிப்பதிவாளர் ஆர்.வேல்ராஜின் கேமரா, ஆக்ஷன் காட்சிகளை அதிரடியாக மட்டும் இன்றி கதை சொல்லும் வகையில் காட்சிப்படுத்தியிருக்கிறது. படம் முழுவதும் சண்டைக்காட்சிகள் நிரம்பியிருந்தாலும் அவற்றுடன் பார்வையாளர்களை பயணிக்க வைக்கும் வகையில் காட்சிகளை படமாக்கியிருக்கிறார் ஒளிப்பதிவாளர் ஆர்.வேல்ராஜ்.
இசையமைப்பாளர் சாம்.சி.எஸ், தமிழ் சினிமாவில் மீண்டும் தனது பெயரை அழுத்தமாக பதிய வைக்கும் வகையில் பணியாற்றியிருக்கிறார்., பீஜியம் மூலம் ஹீரோவின் மாஸை அதிகரிக்கச் செய்திருக்கிறார்
இயக்குநராக அறிமுகமாகியிருக்கும் சண்டை இயக்குநர் அனல் அரசு,. அதிரடிக் காட்சிகளை மையப்படுத்திய கதையென்பதிலேயே பாதி வெற்றியை ஈட்டிவிடுகிறார். சூர்யா சேதுபதியை ஆக்சன் ஹீரோவாக அறிமுகம் செய்யப் பொருத்தமான நல்ல கதையைத் தேர்ந்தெடுத்து, அதற்கு அனல் பறக்கும் சண்டைக் காட்சிகளுடன் விறுவிறுப்பாக நகரக் கூடிய திரைக்கதை அமைத்திருக்கிறார்.
.
