விஜய் விஸ்வாவுக்கும் சாக்ஷி அகர்வாலுக்கும் திருமண ஏற்பாடுகள் நடக்கின்றன. ஆனால் திருமணம் நடக்காதது போல சில அபசகுன தடைகள் ஏற்படுகின்றன. திருமணத்திற்கு முதல் நாள் முக்கியமான புராஜெக்ட் ஒன்றை கம்பெனியில் அமர்ந்து முடித்துவிட்டு கிளம்புகிறார். சாக்ஷி அகர்வால். ஆனால் அவரால் அந்த அலுவலக கட்டடத்தை விட்டு வெளியேற முடியவில்லை.
அங்கே பணியாற்றும் ஒருவரே சாக்ஷியை தன் கட்டுப்பாட்டுக்குள் வைக்க நினைக்கிறார். இத்தனைக்கும் அவர் சாக்ஷிக்கு நன்கு தெரிந்தவர் தான். யார் அவர் ? எதற்காக சாக்ஷியை தடுத்து நிறுத்த நினைக்கிறார் ? சாக்ஷிக்கும் அவருக்குமான முன் கதை என்ன ? சாக்ஷி யின் திருமணம் நடந்ததா ? இதெல்லாம் விறுவிறுப்பான மீதி கதை
படத்தின் நாயகன் விஜய் விஸ்வா என்றாலும் கூட அவர் படத்தில் வருவது குறைவாக நேரம் தான். ஆனால் விஜய் விஸ்வா பொறுப்பை உணர்ந்து நடித்திருக்கிறார். இன்னும் அவருக்கு கொஞ்சம் கூடுதல் நேரம் கொடுத்திருக்கலாம்.
கவர்ச்சி புயலாக வரும் சாக்ஷி அகர்வால் காதலுக்கும் நட்புக்கும் மரியாதை கொடுத்து தனது கேரக்டரில்ன் கண்ணியத்தை காப்பாற்றி இருக்கிறார்.
படத்தில் முக்கிய கதாபாத்திரத்தில் நடித்திருக்கும் படத்தின் இயக்குனர் செல்லக்குட்டி மொத்த படத்தையும் ஆக்கிரமித்துள்ளார். காமெடி, சென்டிமென்ட், நட்பு, வன்மம், பொறாமை என நவரசங்களையும் தனது ஒரே கதாபாத்திரத்தில் கொண்டுவர படம் முழுவதும் முயற்சி செய்து கொண்டே இருக்கிறார். படத்தின் இவருக்கும் சாக்ஷிக்குமான பிளாஷ்பேக் ரொம்பவே வலுவான தூண் போன்றது. அதனால் அதுவே கிளைமாக்ஸை நோக்கி நகர்த்தும் கதையை திரைக்கதையில் பலவீனப்படுத்தி விட்டதோ என்றும் தோன்றுகிறது, நடிப்பு அரக்கன் என்று சொல்லும் விதமாக கிளைமாக்ஸில் கடைசி 20 நிமிடம் நடித்து தள்ளி இருக்கிறார் செல்லக்குட்டி.
இதைத் தாண்டி படத்தின் மற்ற கதாபாத்திரங்களாக செல்லக்குட்டியின் நண்பர்களாக வரும் யோகி பாபு, ரோபோ சங்கர், தங்கதுரை உள்ளிட்ட பலரும் படம் முழுவதும் வருவது போல கதாபாத்திரங்கள் உருவாக்கப்பட்டு இருந்தாலும் அவர்களுக்கான தீனி சரியாக கொடுக்கப்படவில்லை என்று தான் சொல்ல வேண்டும். ஆனாலும் வரும் இடங்களில் சிரிக்க வைக்கிறார்கள்.
காதல் நட்பு இரண்டையும் சமமாக பிரித்துப் பார்க்கத் தெரிந்த செல்லக்குட்டியின் மனதில் தன்னை அறியாமலேயே ஆசையை உருவாக்கும் அம்மா கதாபாத்திரத்தில் நீண்ட நாளைக்கு பிறகு அம்பிகாவை நிறைவான நடிப்பில் பார்க்க முடிகிறது. சாக்ஷியின் அப்பாவாக வரும் பொன்வண்ணனும் காவல்துறை அதிகாரியான அஸ்மிதாவும் கொடுத்த வேலையை சிறப்பாக செய்திருக்கிறார்கள்.
படம் முழுவதும் அதிகப்படியான காட்சிகள் புதிதாக கட்டப்படும் ஒரு மிகப்பெரிய அடுக்குமாடி கட்டிடத்திலேயே எடுக்கப்பட்டுள்ளன. கார்த்திக் ராஜாவின் இசையில் அம்மா பாடல் சென்டிமென்டில் உருக வைக்கும். காதல் கொண்டேன் தனுஷுக்கு சவால் விடும் வகையில் இந்த சாராவை உருவாக்கி இருக்கிறார் இயக்குனர் செல்லக்குட்டி. படம் பார்ப்பவர்களுக்கும் பார்க்கும்போது அது புரியும்.
