பி.எஸ்.மித்ரன் இயக்கத்தில், கார்த்தி நடிப்பில் பெரிதும் எதிர்பார்க்கப்பட்டு வெளியாகி இருக்கும் ‘சர்தார் 2’ திரைப்படம், முதல் பாகத்தின் வெற்றியைத் தக்கவைக்கிறதா ? பார்க்கலாம்.
ஜப்பானிலிருந்து தவறுதலாக இந்தியாவுக்கு வரும் ஒரு பயங்கரமான உயிர் ஆயுதத்திற்கான மாற்று மருந்தைத் தேடி ‘ரா’ (RAW) குழு ஜப்பான் செல்வது, அந்த நடவடிக்கையின் போது ஏற்படும் ஒரு சிறிய தவறால் மூவாயிரத்திற்கும் மேற்பட்ட பழங்குடி மக்கள் உயிரிழப்பது, அந்தப் பழங்குடி குடும்பத்தைச் சேர்ந்த ஒருவன் பழிவாங்கும் வெறியுடன் வில்லனாக மாறி கிளம்புகிறான். இறுதியில் என்ன நடந்தது ?
கார்த்தி வழக்கம் போல் தனது சிறப்பான நடிப்பால் தந்தை மற்றும் மகன் என இரண்டு விதமான கெட்டப்புகளிலும் மிரட்டுகிறார்,; குறிப்பாக அதிரடி சண்டைக் காட்சிகளில் அவர் படும் மெனக்கெடல் திரையில் நன்றாகவே தெரிகிறது.
படத்தில் எஸ்.ஜே. சூர்யாவின் வில்லத்தனமும், அவர் பேசும் வசனங்களும் படத்தின் பலமாக அமைந்திருந்தாலும், சில இடங்களில் திரைக்கதை தொய்வடைவது போலவும், விறுவிறுப்பு குறைவது போலவும் தோன்றுவதை மறுப்பதற்கில்லை.
மாளவிகா மோகனன் மற்றும் ஆஷிகா ரங்கநாதன் ஆகியோர், கதையை நகர்த்துவதற்கு உதவுவதுடன் ஆக்சன் காட்சிகளிலும் ஆச்சர்யப்பட வைக்கிறார்கள்.
இவர்களுடன் நாசர், ஆஷிஷ் வித்யார்த்தி, அச்சுத் குமார் உள்ளிட்ட பல நட்சத்திரங்கள் தங்களது அனுபவமான நடிப்பை வெளிப்படுத்தியுள்ளனர். யோகி பாபுவின் நகைச்சுவை மற்றும் சில வசனங்கள் மட்டுமே படத்தைப் பார்க்கும் போது ரசிகர்களுக்கு சற்றே ஆறுதலாக அமைகின்றன
தொழில்நுட்ப ரீதியாக ஜார்ஜ் சி. வில்லியம்ஸின் ஒளிப்பதிவு படத்திற்கு பலம் சேர்த்துள்ளது சாம்.சி.எஸ்-ன் பின்னணி இசை மற்றும் சண்டைக்காட்சிகள் திரையரங்கிற்கு வந்த ரசிக்கும் அனுபவத்தை ஓரளவு உயர்த்துகின்றன.
எடிட்டர் இன்னும் கொஞ்சம் கவனம் செலுத்தி இரண்டாம் பாதியில் கிட்டத்தட்ட பதினைந்து நிமிடங்களுக்கும் அதிகமான காட்சிகளைக் கத்தரித்திருக்கலாம்.
முதல் பாகத்தில் தண்ணீர் தட்டுப்பாடு மற்றும் வணிகமயமாக்கல் பற்றிய சமூகக் கருத்து பேசப்பட்டது, இந்த இரண்டாம் பாகத்தில் தற்கால மருத்துவ உலகின் மிகப்பெரும் ஆபத்தான ஆன்டிபயாடிக் மருந்துகளின் அதிகப்படியான பயன்பாடு மற்றும் அதன் பக்க விளைவுகள் குறித்த விழிப்புணர்வு பதிவு செய்யப்பட்டுள்ளது. இயக்குநர் பி.எஸ். மித்ரன் வழக்கமாகக் கையாளும் வலுவான உணர்ச்சிகரமான தருங்கள் இப்படத்தில் கொஞ்சம் மிஸ்ஸிங். .ஆனாலும் ஒட்டுமொத்தமாக ஒரு முறை தாராளமாகப் பார்த்து ரசிக்கக்கூடிய ஒரு அதிரடி ஸ்பை த்ரில்லராக ரசிகர்களை சர்தார் ஓரளவு கவர்கிறார்.
