தமிழ் சினிமாவில் வழக்கமாகக் காணும் கிராமத்துப் பின்னணிப் படங்களிலிருந்து முற்றிலும் விலகி, கடலும் பாரம்பரியமும் இணைந்த பாய்மரப் படகுப் போட்டியை மையமாகக்கொண்டு உருவாகியுள்ள அதிரடித் திரைப்படம்தான் ‘மண்டாடி’. மதிமாறன் புகழேந்தி இயக்கத்தில் உருவாகியுள்ள இப்படம், ஊர்ப்பகை, நட்பு, காதல், துரோகம் மற்றும் பழிவாங்கும் உணர்வு போன்ற பல சுவாரஸ்யமான அம்சங்களை ஒரே கதையாகக் கொண்டு ரசிகர்களைக் கவர்ந்துள்ளது.
ராமநாதபுரம் கடலோரப் பகுதி கோவில் திருவிழாவுடன் தொடர்புடைய பாய்மரப் படகுப் போட்டியே இப்படத்தின் மையக்கதையாகும். இப்போட்டியைச் சுற்றி எழும் இரண்டு அணிகளின் மோதலில், பழைய நண்பர்களான சூரி மற்றும் சுகாஸ் ஏன் எதிரிகளானார்கள் என்பதற்கான பின்னணியும், சொந்த ஊரை விட்டு இருபது ஆண்டுகள் கழித்து சூரி மீண்டும் திரும்புவதற்கான காரணமும் கதையை விறுவிறுப்பாக நகர்த்துகின்றன. ஊரில் செல்வாக்குமிக்கவரான சுகாஸுடன் மீண்டும் மோதும் சூரி, போட்டியைச் சுற்றியுள்ள அரசியல் மற்றும் உள்குத்துக்களை எப்படி எதிர்கொள்கிறார் என்பதே படத்தின் திரைக்கதை.
படத்தில் நடிகர் சூரியின் மாறுபட்ட தோற்றமும் அழுத்தமான நடிப்பும் மிகப்பெரிய பலமாக அமைந்துள்ளது. நகைச்சுவைகளுக்கு இடமில்லாமல், கோபம் மற்றும் பாய்மரப் போட்டியின் மீதான பற்றை வெளிப்படுத்தும் அவரது கதாபாத்திரம் திரைப்பயணத்தில் குறிப்பிடத்தக்கதாக இருக்கும்.
அவருக்கு நிகராக, வில்லன் பாத்திரத்தில் நடித்துள்ள சுகாஸின் கோபமான பேச்சும் தீவிரமான சண்டைக் காட்சிகளும் படத்திற்கு கூடுதல் பலம் சேர்க்கின்றன. வழக்கமான கதாநாயகி சாயல் இல்லாமல், கோபம், நடனம் மற்றும் முதிர்ச்சியான வெளிப்பாடுகளுடன் மகிமா நம்பியாரின் நடிப்பும் கவனிக்க வைக்கிறது.
மேலும், போட்டியில் அனுபவசாலியாக வரும் சத்யராஜ் மற்றும் பாலா சரவணன், ரவீந்திர விஜய் உள்ளிட்டோரின் துணைக் கதாபாத்திரங்களும் தங்களின் பங்களிப்பைச் சிறப்பாக வழங்கியுள்ளன.
தொழில்நுட்ப ரீதியாக, எஸ்.ஆர். கதிரின் ஒளிப்பதிவு கடலையும் படகுப் போட்டியையும் வெறும் பின்னணியாகக் காட்டாமல் கதையின் ஒரு பகுதியாகவே மாற்றி மிகப்பெரிய பலம் சேர்த்துள்ளது. பீட்டர் ஹெய்னின் சண்டைக் காட்சிகளும், கடலின் நடுவே நடைபெறும் நீண்ட கிளைமாக்ஸ் போட்டியும் படத்திற்குத் தேவையான பிரம்மாண்டத்தையும் பரபரப்பையும் கொடுக்கின்றன. இவற்றுடன் ஜி.வி.பிரகாஷின் பின்னணி இசையும் படத்தின் வேகத்தை வெற்றிகரமாக உயர்த்துகிறது.
இயற்கையின் சீற்றம் மற்றும் எதிர்பாராத தாக்குதல்களைச் சூரியின் அணி எவ்வாறு சமாளித்து வெற்றி பெறுகிறது என்பதே படத்தின் பரபரப்பான க்ளைமாக்ஸ் ஆகும். சுருக்கமாகக் கூறின், கடல் பின்னணியிலான அதிரடித் திரைப்படங்களையும் தனித்துவமான விளையாட்டுப் போட்டிகளை மையமாகக் கொண்ட கதைகளையும் விரும்புபவர்களுக்கு ‘மண்டாடி’ ஒரு நல்ல அனுபவத்தைத் தரும்.
