மலையாள திரையுலகிற்கே உண்டான ஸ்பெஷலிஸ்ட் கதையான க்ரைம் இன்வெஸ்டிகேஷன் திரில்லர் பாணியில் உருவாகியுள்ள படம் தான் அனோமி.
அடுத்தடுத்து இரண்டு இளைஞர்கள் தற்கொலை செய்து கொள்கின்றனர். ஏற்கனவே அவர்கள் சில முறை தற்கொலைக்கு முயற்சி செய்தவர்கள் என்பதால் போலீஸ் அதிகாரியான ரகுமானும் அதை தற்கொலை என்று நான் முடிவு செய்து அறிக்கை சமர்ப்பிக்கிறார். ஆனால் தடயவியல் நிபுணரான பாவனா, அதில் இரண்டாவது தற்கொலை செய்து கொண்ட நபர் தன்னுடைய தம்பி என்பதால் அதுகுறித்த தீவிர ஆராய்ச்சியில் இறங்குகிறார். அப்போதுதான் அது தற்கொலை அல்ல இரண்டுமே கொலைகள் என தெரிய வருகிறது.
இது குறித்து ரகுமான் விசாரணை சரியில்லை ஆளை மாற்றுங்கள் என நீதிமன்றம் வரை செல்கிறார் பாவனா. இந்த நிலையில் பாவனா கணித்தபடி மூன்றாவதாகவும் ஒரு தற்கொலை நிகழ்கிறது. அதுவும் கொலை என ரகுமானுக்கும் தெரிய வருகிறது. இப்படி தற்கொலை மனோபாவம் கொண்ட இளைஞர்களாக தேர்ந்தெடுத்து அவர்களை தற்கொலை போலவே தோற்றமளிக்கும் விதமாக கொலை செய்யும் நபர் அல்லது நபர்கள் யார் என தீவிரமான விசாரணையில் இறங்குகிறார் ரகுமான்.
இன்னொரு பக்கம் தன் தம்பியின் மரணத்திற்கு காரணமானவர்களை கண்டுபிடிக்க பாவனாவும் களமிறங்குகிறார்.. இருவரும் இறுதியாக ஒரே புள்ளியில் சேர்கிறார்கள். இருவரது விசாரணையிலும் பல திடுக்கிடும் அதிர்ச்சியான சம்பவங்கள், உண்மைகள் வெளியே வருகின்றன. அவை என்ன ? இறுதியாக இந்த குற்றவாளிகளை ரகுமான் அல்லது பாவனா கண்டுபிடித்தார்களா ? எப்படி கண்டுபிடிக்கிறார்கள் என்பதே விறுவிறுப்பான மீதிக்கதை.
துப்பறியும் போலீஸ் அதிகாரி என்றால் ரகுமானுக்கு அளவெடுத்து தைத்த சட்டை மாதிரி கச்சிதமாக பொருந்தி இருக்கிறது. கதையின் நாயகனாகவே முழு படத்தையும் அவரால் தாங்க முடிகிறது. முதலில் அலட்சியமாக விசாரணை நடத்தினாலும் பின்னர் தனக்கே தண்ணி காட்டும் அந்த வில்லனை அவர் துரத்தி துரத்தி தேடிப்பிடிக்கும் காட்சிகளும் அதிரடி சண்டை காட்சிகளும் என ஒட்டுமொத்த படத்தையும் நான் பங்கிற்கு விறுவிறுப்பாக்கி இருக்கிறார் ரகுமான்.
அவருக்கு கொஞ்சமும் சளைத்தவர் இல்லை என்கிற விதமாக நடிகை பாவனா, தனது தம்பியின் மரணத்தால் தாங்க முடியாத துயரத்திற்கு ஆளாவதும் தடயவியல் நிபுணர் என்பதால் சின்ன சின்ன தடயங்களை கூட ஆராய்ந்து அதன் பின்னணியில் உள்ள உண்மைகளை கொண்டு வருவதும் ஒரு கட்டத்தில் தம்பியின் மரணத்தை கண்டுபிடிக்க கொலையாளியை நோக்கி கொஞ்சம் கொஞ்சமாக நெருங்குவதும், நிஜமான கொலையாளி யார் என தெரிய வரும்போது அதிர்ச்சி அடைவதும் என பாவனாவுக்கும் இந்த படத்தில் ஸ்கோர் பண்ண ஏராளமான காட்சிகள் உண்டு. அதை அவர் திறம்பட செய்திருக்கிறார்.
படத்தின் மற்ற கதாபாத்திரங்களும் மிக பொருத்தமான தேர்வு என நிரூபித்து இருக்கிறார்கள். திரில்லர் ஏற்றவாறு விறுவிறுப்பான ஒளிப்பதிவை கொடுத்துள்ளார் ஒளிப்பதிவாளர் சுஜித் சாரங். அதற்கு பக்கபலமாக இணைந்து பயணித்திருக்கிறது ஹர்ஷவர்தன் ராமேஸ்வரின் பின்னணி இசை. காட்சிக்கு காட்சி இவர்கள் இருவரும் இணைந்து நமக்குள் ஒரு பதற்றத்தை ஏற்படுத்தி விடுகிறார்கள்.
தேவையற்ற காட்சிகள் எதுவும் இல்லாமல் சீரான போக்கில் கதையை கொண்டு சென்றிருக்கிறார் இயக்குனர் ரியாஸ் மராத். துப்பறியும் கதைகள் பல வந்து விட்டாலும் அதிலிருந்து இந்த கதையை எப்படி வித்தியாசப்படுத்த வேண்டும், தொடர் சைக்கோ கொலைகளுக்கான பின்னணி காரணம் எப்படி புதுமையாக இருக்க வேண்டும் என்பதில் மிக கவனமாக இருந்து அதை அழகாக ரசிகர்களுக்கு கடத்தி வெற்றியும் பெற்றிருக்கிறார் இயக்குனர்.
இன்வெஸ்டிகேஷன் திரில்லர் படங்களை விரும்பும் ரசிகர்களுக்கு இந்த அனோமி நிச்சயமாக ஒரு விருந்துதான்.
