சமீப காலமாகவே போதைப்பொருள் கடத்தலை மையப்படுத்தி படங்கள் வெளியாகி வரும் நிலையில் அப்படி அதே கதைக்களத்தில் வெளியாகி இருக்கும் இன்னொரு படம் தான் இந்த தாவூத். மற்ற படங்களில் இருந்து இது எப்படி வித்தியாசப்படுகிறது ?
தமிழ்நாட்டில் இருந்து ஒரு போதை பொருள் கடத்தல் மாஃபியாவாக மாறும் தாவூத் என்பவர் மும்பையிலிருந்து தனது கடத்தல் விவகாரங்களை கவனிக்கிறார். அவர் யார் என்பது அவரை சுற்றி இருப்பவர்களுக்கே கூட தெரியாத நிலையில் போலீஸ் அதிகாரி ஒருவர் அவரை கண்டுபிடிக்க முயற்சிகள் தீவிரமாக இறங்குகிறார்.
தாவூத்தின் சரக்கு ஒன்று முக்கிய நபருக்கு கைமாற இருக்கும் நிலையில் தாவூத்திடம் விசுவாசியாக இருக்கும் தீனா அதை எப்படியாவது தனக்கு உடைமையாக்கிக் கொள்ள திட்டமிடுகிறார். போலீசும் சரக்கை தடுத்து நிறுத்தி கைப்பற்ற முயற்சிக்கிறது..
இந்த நிலையில் தாவூத்திடம் இன்னொரு விசுவாசியாக வேலை பார்க்கும் ஒருவர் கால் டாக்ஸி ஓட்டுனரான லிங்காவை இந்த சரக்கு கைமாற்றும் வேலைக்கு பயன்படுத்த முடிவு செய்கிறார். லிங்கா இந்த பணியை திறம்பட செய்தாரா ? இதில் அவர் என்னென்ன பிரச்சனைகளை எதிர்கொண்டார் ? யார் அந்த தாவூத் ? போலீசாரிடம் அவர் சிக்கினாரா என்கிற பல கேள்விகளுக்கு மீதிப்படம் விடை சொல்கிறது.
கதாநாயகனாக வரும் லிங்கா, தனது கதாபாத்திரத்தில் நிறைவாக நடித்திருக்கிறார். அப்பாவியாக வந்தாலும் முரட்டுத்தனமானவராக வந்தாலும் அதற்குப் பொருத்தமாக இருக்கிறார் லிங்கா. அதிலும் அப்பாவி டிரைவராக வரும் லிங்கா, இறுதியில் எடுக்கும் ஆக்ஷன் அவதாரம் எதிர்பாராதது. அந்தவகையில் தனது கதாபாத்திரத்திற்கு நியாயம் சேர்க்கும் விதமாக அவரது நடிப்பு இருக்கிறது.
கதாநாயகியாக நடித்திருக்கும் சாரா ஆச்சர், கதாநாயகனுக்கு ஜோடியாக அல்லாமல் வில்லன் கூட்டத்தில் இருப்பவருக்கு ஜோடியாக சுற்றி வருகிறார்.
லிங்காவின் நண்பனாக நடித்துள்ள ஷாரா, காவல்துறை அதிகாரியாக நடித்துள்ள அர்ஜெய், திலீபன், சாய் தீனா, அபிஷேக், ராதாரவி, சேரன் ராஜ் என அனைவரும் அவரவர் கதாபாத்திரங்களில் நன்கு நடித்துள்ளார்கள்.
ராக்கேஷ் அம்பிகாபதியின் பின்னணி இசை ஆக்ஷன் திரில்லர் படத்திற்கான அனைத்து அம்சங்களுடன் படத்திற்கு பலம் சேர்த்திருக்கிறது. சரத் வளையாபதி-, பிரேண்டன் சுஷாந்த் கேமரா, ஆக்ஷன் திரில்லர் உணர்வுகளை அப்படியே ரசிகர்களிடம் கடத்தி விடுகிறது. .
கண்ணுக்கு தெரியாமல் மறைந்திருந்து ரவுடி கூட்டத்தையே நடுங்க வைக்கும் அந்த தாவூத் யார் என்ற ஆவல் கிளைமாக்ஸ் நெருங்க நெருங்க அதிகரிக்கிறது. அதுமட்டுமல்ல, வழக்கமான கேங்ஸ்டர் படமாக இல்லாமல், சென்டிமெண்ட் கலந்து படம் நகவது ஒரு ஆச்சர்யம்.. அந்த அளவுக்கு எடுத்துக்கொண்ட கதைக்கு தேவையான வகையில் திரைக்கதையில் விறுவிறுப்பு கூட்டியிருக்கிறார் இயக்குனர் பிரசாந்த் ராமன்.
