நீண்ட நாளைக்கு பிறகு நடிகர் ஆனந்தராஜ் கதையின் நாயகனாக நடித்துள்ள படம் இது. இதற்கு முன் பல படங்களில் அவர் காமெடி தாதாவாக வந்துள்ளார். இதில் காமெடி மற்றும் கொஞ்சம் சீரியஸ் கலந்த சென்னை தாதாவாக வருகிறார். இரண்டு பொண்டாட்டிக்காரர் வேறு. ஒரு பக்கம் இரண்டு குடும்பங்களையும் சமாளித்துக் கொண்டு இன்னொரு பக்கம் தாதா தொழிலையும் பார்க்கிறார்.
அதனால் இவரை அடக்கி ஒடுக்குவதற்காக புதிய போலீஸ் ஆபீஸர் சம்யுக்தா களம் இறங்குகிறார். இன்னொரு பக்கம் தொழில் போட்டி காரணமாக ஆனந்தராஜை போட்டுத்தள்ள சிலர் திட்டம் தீட்டுகின்றனர். ஒரு பக்கம் போலீஸ் வேட்டை, இன்னொரு பக்கம் கொலைவெறி கும்பல். இது இரண்டையும் ஆனந்தராஜ் சமாளித்தாரா ? அது எப்படி என்பது மீதிக்கதை.
ஆனந்தராஜ் கொஞ்ச நேரம் வந்தாலே செம கலாட்டாவாக இருக்கும்., கதையின் நாயகன் என்றால் கேட்க வேண்டுமா ? இந்தப்படத்தில் வாய்ப்பு கிடைக்கும் போது வில்லனாகவும், மற்ற சமயங்களில் சிரிக்க வைக்கும் நகைச்சுவை நடிகராகவும் கலந்து கட்டி நடித்து அந்த தாதா கதாபாத்திரத்தை சிறப்பித்திருக்கிறார்.
காவல்துறை அதிகாரியாக நடித்திருக்கும் பிக்பாஸ் புகழ் சக்யுக்தா, காக்கி சீறுடையில் கம்பீரமாக இருக்கிறார். ஆக்ஷன் காட்சிகளிலும் அதிரடி காட்டிள்ளதுடன், தனக்கு கிடைத்த குறைந்த வாய்ப்பிலும் தனது கதாபாத்திரத்திற்கு நியாயம் சேர்க்கும் வகையில் நடித்திருக்கிறார்.
இது முனீஸ்காந்தின் காலம் என்பது போல இந்தப்படத்திலும் கொண்டித்தோப்பு வரதன் கதாபாத்திரத்தில் நானும் ரவுடிதான் என்று டம்மி ரவுடியாக முனீஸ்காந்த் சிரிக்க வைக்கிறார்..
ஆனந்தராஜின் மனைவியாக நடித்திருக்கும் தீபா சக்களத்தி சண்டையில் அவ்வாப்போது சிரிக்கவும் வைக்கிறார்.
ஸ்ரீகாந்த் தேவாவின் இசையில் பாடல்களிலும் சரி. பின்னணி இசையிலும் குறையில்லை. ஒளிப்பதிவாளர் அசோக்ராஜின் கேமரா காட்சிகளை கலர்புல்லாக படமாக்கி படத்தின் தரத்தை உயர்த்தியிருக்கிறது..
தாதா கதையாக இருந்தாலும் அதில் குடும்ப செண்டிமெண்ட், சக்களத்தி சண்டை என ஒரு தாதா குடும்பத்தில் நடக்கும் பிரச்சனைகளை மையப்படுத்தி காமெடியுடன் கதையை நகர்த்தி இருக்கிறார் இயக்குநர் ஏ.எஸ்.முகுந்தன். ஆனந்தராஜ் தான் கதையின் நாயகன் என்றாலும் அதிலும் தேவையான கமர்ஷியல் அம்சங்களையும் சேர்த்து மினிமம் கியாரண்டி காமெடி படமாக கொடுத்திருக்கிறார்.
