மலேசியாவில் இருக்கும் நாயகன் முகேன் ராவ். தனது சொந்த ஊரான சென்னைக்கு வர தயாராகிறார். அந்த சமயத்தில், பழங்கால பொருட்கள் விற்கும் கடைக்குச் செல்லும் முகேன், அங்கிருக்கும் பெட்டி ஒன்றை பார்க்கிறார். அதில், ஜின் ஒன்றை அடைத்து வைத்திருப்பதாகவும் அது நல்ல ஜின் என்றும் கூறுகிறார் கடைக்காரர். அதை வாங்கிக் கொண்டு தனது ஊருக்கு வருகிறார்.
அது வந்த பிறகு, காதல், கல்யாணம், இசைக்குழு தொடக்கம் என்று அவரது வாழ்க்கையில் பல நல்ல விசயங்கள் நடக்கிறது. அதே சமயம், அவ்வபோது வீட்டில் இருப்பவர்களுக்கு சில பிரச்சனைகள் ஏற்படுகிறது. குறிப்பாக வீட்டில் தனியாக இருந்த காதலி ரத்த வெள்ளத்தில் உயிருக்கு ஆபத்தான நிலையில் கிடக்க அதற்கு காரணம், ஜின் தான் என்று அதை தூக்கி வெளியே வீசி விடுகிறார் முகேன்..
அதன்பிறகு காதலி பாவ்யாவிற்கு என்ன நடந்தது.? முகேனை ஜின் சுற்றி சுற்றி வர என்ன காரணம்.?? உள்ளிட்ட பல கேள்விகளுக்கு இரண்டாம் பாதியில் விடை வைத்திருக்கிறார் இயக்குனர் .
நாயகனாக நடித்திருக்கும் முகேன் ராவ், நடிப்பதை விட சிரிப்பதை தான் அதிகம் செய்திருக்கிறார். காதல், கோபம், நகைச்சுவை என பல உணர்வுகளை வெளிப்படுத்தக் கூடிய வாய்ப்பு இருந்தும், அவற்றை செய்ய தெரியாமல் தடுமாறியிருப்பவர், அதனை சமாளிப்பதற்காக படம் முழுவதும் விதவிதமாக சிரித்து மழுப்புகிறார்..
காதல் மனைவியாக பவ்யா திரிகா படத்தின் முக்கிய காட்சிகளின் மையப்புள்ளியாகவும், எதிரிகளிடமிருந்து தப்பித்து ஒடும் காட்சிகளிலும், பதற்றமான காட்சிகளில் பிரகாசிக்கிறார்.
பால சரவணனின் காமெடி படத்தில் நன்றாகவே வொர்க் அவுட் ஆகியுள்ளது. ராதாரவி, இமான் அண்ணாச்சி, வடிவுக்கரசி, நிழல்கள் ரவி, வினோதினி வைத்தியநாதன் என சீனியர்கள் தங்களது நடிப்பை அளவாக செய்து முடித்திருந்தனர்.
ஜின் படத்தின் ஒளிப்பதிவாளர் அர்ஜுன் ராஜாவின் பணி ரசிக்கும்படி இருக்கிறது. இசையமைப்பாளர் விவேக் மெர்வினும் தன் பங்களிப்பை குறைவின்றி செய்திருக்கிறார்.
பல நூறு ஆண்டுகளுக்கு முன்பு பெட்டியில் அடைக்கப்பட்ட ஜின் முகேன் வசம் வருவதற்கான பின்னணி கதைகளை ஓவிய காட்சிகளாக சொல்லப்பட்டாலும், சுவாரஸ்யமாக சொல்லியிருக்கிறார்கள்.. திரைக்கதையை இன்னும் சற்று பரபரப்பாக கொடுத்திருந்திருக்கலாம்.. நல்ல ஜின் மற்றும் தீய ஜின் இரண்டுக்குமான ப்ளாஷ் பேக் காட்சிகளை சற்று சுவாரஸ்யமாக கொடுத்திருந்தார் இயக்குனர். வசனத்திலும் நன்றாகவே தனது உழைப்பைக் கொடுத்திருக்கிறார்.
.
