நாயகி ஆஷ்லி (மமிதா பைஜு) தன் குடும்பத்துடன் கிராமத்தில் இருந்து கல்லூரி படிப்புக்காக நகரத்திற்கு குடிபெயர்கிறார். அங்குள்ள தன் பக்கத்து வீட்டுக்காரரான ஜஸ்டின் (நிவின் பாலி) மீது அவருக்கு ஈர்ப்பு ஏற்பட்டு காதலாக மாறுகிறது. வயது வித்தியாசத்தைக் கொண்ட இவர்களின் காதலில், குடும்பச் சூழல், சமூகக் கட்டுப்பாடுகள் மற்றும் ஊர் வதந்திகள் எப்படி குறுக்கிடுகின்றன, அதை அவர்கள் எப்படி எதிர்கொள்கிறார்கள் என்பதுதான் படத்தின் மீதிக்கதை.
நீண்ட நாட்களுக்குப் பிறகு நிவின் பாலியின் இயல்பான நகைச்சுவை டைமிங் மற்றும் ரிலாக்ஸ்டான நடிப்பு படத்திற்கு மிகப்பெரிய பலம். வயதுக்கு ஏற்ற பக்குவமான நடிப்பை வெளிப்படுத்தி ரசிகர்களைக் கவர்ந்துள்ளார்
க்யூட்டான நடிப்பாலும், அழுத்தமான வெளிப்பாட்டாலும் தன் கதாபாத்திரத்திற்கு நியாயம் சேர்த்துள்ளார். நிவின் பாலி – மமிதா பைஜு ஜோடியின் கெமிஸ்ட்ரி திரையில் அருமையாக ஒர்க் அவுட் ஆகியுள்ளது
படத்தில் வரும் மற்ற கதாபாத்திரங்களும், குடும்பப் பின்னணி நடிகர்களும் இயல்பான நகைச்சுவையால் சிரிக்க வைக்கின்றனர்
விஷ்ணு விஜயின் இசையும் பின்னணி இசையும் படத்தின் ஃபீல்-குட் மூட்டைத் தாங்கிப் பிடிக்கிறது. அஜ்மல் சாபுவின் கேமரா வேலைப்பாடுகள் வீடுகள் மற்றும் சுற்றுப்புறங்களை வெதுவெதுப்பான, நேர்த்தியான கிராமத்து உணர்வைத் தருகிறது.
இயக்குநர் கிரிஷ் ஏ.டி. வழக்கம்போல மிகச் சாதாரண மனிதர்களின் எதார்த்தமான வாழ்க்கையை எவ்வித திணிப்பும் இல்லாமல் கலகலப்பாகக் கொண்டு சென்றுள்ளார். வயது வித்தியாசமான காதல் கதைகளில் பொதுவாக இருக்கும் ஆபாசமான அல்லது நெருடலான தன்மைகள் இல்லாமல், மிகப் பக்குவமாகவும் கியூட்டாகவும் இதைக் கையாண்டுள்ளனர்.
முதல் பாதி கதாபாத்திரங்களை அறிமுகப்படுத்த சற்று மெதுவாக நகர்ந்தாலும், இரண்டாம் பாதி கலகலப்பாகவும் கமர்ஷியல் எண்டர்டெயினராகவும் மாறுகிறது. பெரிய எதிர்பார்ப்புகள் இல்லாமல், குடும்பத்துடன் தியேட்டரில் உட்கார்ந்து ஜாலியாகச் சிரிக்கக்கூடிய, மனதுக்கு நெருக்கமான ஒரு ஃபீல்-குட் ரொமான்டிக் காமெடி படம் இது
