கிராமத்து காதலர்கள் ரஜினி கிஷன், திவிவிகா இருவரும் பெற்றோருக்கு தெரியாமல் ஊரைவிட்டு ஓடிப்போய் திருமணம் செய்ய நள்ளிரவில் கிளம்புகிறார்கள். வழியில் காரில் வரும் முனிஸ்காந்ததிடம் லிப்ட் கேட்டு ஏறி ஏற்காடு செல்கிறார்கள். அங்கே திருமணமும் நடக்கிறது.
முதலிரவின்போது திவிவிகாவின் மீது பேய் பிடிக்கிறது. அதை ஓட்டுவதற்காக வருகிறார் மொட்ட ராஜேந்திரன். திவிவிகாவை பிடித்த பேய் யார் ? அதன் நோக்கம் என்ன ? மொட்ட ராஜேந்திரன் அதை ஓட்டினாரா ? காதலர்கள் பிரச்சனை தீர்ந்ததா என்பது தான் ரஜினி கேங் படத்தின் கதை.
நாயகன் ரவி கிஷன் அமுல் பேபி போல பார்ப்பதற்கு அழகாக இருக்கிறார். நன்றாக டான்ஸ் ஆடுகிறார். ஓரளவு நடிக்கவும் செய்கிறார். காமெடி காட்சிகளும் அவருக்கு கை கொடுக்கின்றன.
நாயகி திவிவிகா செதுக்கி வைத்த சிலை போல அம்சமாக இருக்கிறார். பேய் புகுந்த பின் அவரது ஆக்ரோஷமான நடிப்பு அட்டகாசம்.
படம் முழுக்க பயணிக்கும் கதாபாத்திரத்தில் முனீஸ்காந்த். அவரை அளவாக பயன்படுத்தினால் நல்ல காமெடி நடிகராக இருப்பார். அளவுக்கு அதிகமாக பயன்படுத்தும் போது அதுவே மைனஸ் ஆகி விடுகிறது. இந்த படத்திலும் அது தான் நடந்திருக்கிறது.
மொட்ட ராஜேந்திரன் வழக்கம் போல கலகலப்பூட்டுகிறார். பேய் ஓட்டுவதற்கு அவர் கையாளும் டெக்னிக் புதுசு. காரில் கூடவே பயணிக்கும் அந்த திருடன் கதாபாத்திரமும் ஓரளவுக்கு காமெடி பண்ண முயற்சித்து இருக்கிறார்.
கலகலவென ஒரு பொழுதுபோக்கு படத்தை மனதில் கொண்டு இந்த படத்தை இயக்கியிருக்கிறார் இயக்குனர் ரமேஷ் பாரதி. எந்தவித லாஜிக்கும் பார்க்காமல் ஜாலியாக பொழுது போக்க நினைக்கும் ரசிகர்களுக்கு இந்தப் படம் ஓரளவு திருப்தி தரும்.
