நடிகர் கருணாஸின் மகன் கென் கருணாஸ் இயக்குனராக, கதாநாயகனாக என ஒரே நேரத்தில் களம் இறங்கி இருக்கும் படம் தான் யூத். இரண்டிலும் தேறினாரா ? கரை ஏறினாரா ? பார்க்கலாம்ல்.
பேக்கரி நடத்தும் சுராஜ் வெஞ்சாரமூடுவின் மனைவி தேவதர்ஷினி. காதல் திருமணம் செய்து கொண்ட இவர்களின் மகன் கென் கருணாஸ். பத்தாம் வகுப்பிலேயே பார்டரில் பாஸ் ஆகும் தன் மகனுக்கு பிரின்ஸ்பாலான நளினியிடம் கெஞ்சி கூத்தாடி பிளஸ் ஒன் படிக்க இடம் வாங்கி தருகிறார் அம்மா தேவதர்ஷினி.
ஆனால் பள்ளியில் படிக்கும் நாட்களில் அந்த இளம் வயதுக்கே உரிய கிறக்கம் காரணமாக உடன்படிக்கும் பெண்கள் மீது ஈர்ப்பாகி மூன்று பெண்கள் மீது ஒரே சமயத்தில் அடுத்தடுத்து காதலில் விழுகிறார் கென். இதனால் படிப்பில் கவனம் சிதற, காதலித்த பெண்கள் ஏதோ ஒரு காரணம், சூழ்நிலை காரணமாக கென்னை விட்டு விலகும் சூழலும் உருவாகிறது.
ஏற்கனவே மகனிடம் இருந்து ஒதுங்கி நிற்கும் தந்தை, மகனை மலை போல எதிர்பார்க்கும் தாய் இவர்கள் நம்பிக்கையை கென் காப்பாற்றினாரா ? காதலை உதறினாரா அல்லது காதலிலும் ஜெயித்தாரா என்பதற்கு மீதி கதை விடை சொல்கிறது.
தானே இயக்குனராகவும் அதேசமயம் ஹீரோவாகவும் நடிக்க வேண்டும் என்பதால் தனக்கேற்ற ஒரு பள்ளிக்கூட கதையை கச்சிதமாக தேர்ந்தெடுத்திருக்கிறார் கென். ஒரு பள்ளி மாணவனாக அந்த பருவத்தில் ஏற்படும் சலனங்களையும் குறும்புத்தனங்களையும் விட்டேத்தியான போக்கையும் படம் முழுக்க அழகாக பிரதிபலித்திருக்கிறார் கென். தந்தையுடன் முரண்பட்டு நின்றாலும் ஒரு கட்டத்தில் படிப்பின் அருமையை உணர்ந்து அவர்களுக்கு பெருமை சேர்க்க முயற்சி எடுக்கும்போது இன்றைய இளம் மாணவர்களுக்கு ஒரு மெசேஜையும் சரியாக தனது கதாபாத்திரம் மூலம் கொண்டு சேர்க்கிறார்.
தமிழ் சினிமாவிற்கு அப்போது சில மலையாள நடிகர்கள் வருகை தந்து நங்கூரம் போட்டபடி அமர்ந்து கொள்வார்கள் இப்போது சுராஜ் நெஞ்சார மூடுவின் காலகட்டம். கென்னின் தந்தையாக மலையாள நடிகர் சுராஜ் வெஞ்சாரமூடு ஒரு நடுத்தர வர்க்கத்தை மனிதராக, மகனாவது நன்றாக படித்து மேலே வந்து விட மாட்டானா என ஏங்கும் தந்தையாக தனது தவிப்பையும் பாசத்தையும் அழகாக வெளிப்படுத்தி இருக்கிறார்.
அவரது மனைவியாக ஒரு நடுத்தர வர்க்கத்து தாயாக தனது ஆசைகளையும் அபிலாசைகளையும் அழகாக வெளிப்படுத்தி இருக்கிறார் தேவதர்ஷினி.
ஒன்றுக்கு மூன்று கதாநாயகிகள். இதில் ஏற்கனவே சிறை படத்தில் நம்மை வசீகரித்த அனிஷ்மா இந்த படத்திலும் முதல் இடத்தில் நம்மை கவர்கிறார். அடுத்ததாக மீனாட்சி தினேஷ், பிரியான்ஷி என இரண்டு பேருமே படம் முழுவதும் தங்கள் வசீகரமான அழகாக நடிப்பாலும் நம்மை கட்டிப்போட்டு விடுகிறார்கள். அந்த வகையில் மூன்று முத்தான கதாநாயகிகளை கச்சிதமாக தேர்ந்தெடுத்து இருக்கிறார் இயக்குனர்.
கென்னின் நண்பர்களாக வரும் மாணவர்கள் பிரசாந்த் காலத்திலிருந்து ஹீரோவின் நண்பர்கள் என்ன செய்வார்களோ இந்தப் படத்திலும் அதேதான் செய்திருக்கிறார்கள். ஓரளவுக்கு கலகலப்புக்கும் உத்தரவாதம் கொடுக்கிறார்கள்.
படத்தை விறுவிறுப்பாக்கியதிலும் மனதில் பதிய வைத்ததிலும் ஜிவி பிரகாஷின் பின்னணி இசைக்கும் பாடல்களுக்கும் முக்கிய பங்கு உண்டு. அதே போல, தன் முதல் படத்திலேயே ஒளிப்பதிவாளர் வெற்றியின் துணை கொண்டு கலர்ஃபுல்லான காட்சிகளை கண்ணுக்கு விருந்தாகவும் கொடுத்துள்ளார்.
ஆச்சரியமாக மாணவர்கள் தண்ணி அடிப்பது, தம் அடிப்பது, இரட்டை அர்த்த வசனங்கள் போன்ற கீழ்த்தரமான எந்த காட்சிகளையும் சேர்க்காமல் பள்ளி மாணவர்களின் காலங்களில் அவர்கள் மனதில் என்னென்ன மாற்றங்கள் நிகழும் அதை எப்படி சரியாக நெறிப்படுத்த வேண்டும் என்பதை மையமாக வைத்து தனது முதல் படத்தையே வெற்றி படமாக கொடுத்திருக்கிறார் நடிகரும் இயக்குனருமான கென். இனி அடுத்தடுத்து இவரது பயணம் வெற்றி பயணமாக தொடர வாழ்த்துக்கள்.
