எதிர்காலத்தைக் கணிக்கும் ஒரு மர்மமான புத்தகம், ஏழு ஆண்டுகளுக்கு ஒருமுறை நடக்கும் விசித்திரமான மரணங்கள் மற்றும் ஒரு சைக்கோ கொலைகாரன் இவற்றை இணைத்து விறுவிறுப்பாக நகரும் ஒரு சஸ்பென்ஸ் த்ரில்லராக இப்படத்தி கொடுத்துள்ளார்கள்.
மேக்கரை என்ற மலைக்கிராமத்தில் ஜூன் மாதத்தில் ஏழு ஆண்டுகளுக்கு ஒருமுறை ஆண்கள் மர்மமான முறையில் இறப்பது வழக்கமாக இருக்கிறது, இதனை அந்த ஊர் மக்கள் ‘வனமங்கை’ என்ற தெய்வத்தின் சாபம் என்று நம்புகின்றனர். இந்தச் சூழலில் 1970-களில் ஒரு நூலகருக்கு பிரெஞ்சு ஆராய்ச்சியாளர் எழுதிய ‘தி டார்க் ஹெவன்’ என்ற அமானுஷ்ய புத்தகம் கிடைக்கிறது; அது எதிர்கால நிகழ்வுகளைத் துல்லியமாகக் கணிக்கிறது.
அந்தப் புத்தகம் பல காலகட்டங்களைக் கடந்து வெவ்வேறு மனிதர்களின் கைகளுக்கு மாறும்போது விபரீதங்கள் தொடர்கின்றன. இதற்கிடையில் கேரளா எல்லையிலிருந்து வந்த ஒரு சைக்கோ கொலைகாரன் நிகழ்த்தும் தொடர் கொலைகளைப் புலனாய்வு செய்யப் புதிய காவல் ஆய்வாளர் அந்த ஊருக்கு வருகிறார். அந்தப் புத்தகம், கிராமத்துச் சாபம் மற்றும் தொடர் கொலைகள் ஆகியவற்றுக்கு இடையே உள்ள மர்மமான முடிச்சுகள் எப்படி அவிழ்கின்றன என்பதே மீதிக்கதை.
கொலைகளைப் புலனாய்வு செய்யும் காவல் அதிகாரியாக வரும் சித்து தனக்குக் கொடுக்கப்பட்ட சவாலான கதாபாத்திரத்தை மிகவும் எளிமையாகவும் முதிர்ச்சியுடனும் கையாண்டு கதையை நகர்த்தியுள்ளார்.
பிக் பாஸ் புகழ் தர்ஷிகா நவரத்னராஜா கதாநாயகியாகத் தனது பங்கிற்குப் பொருத்தமான நடிப்பைத் தந்துள்ளார். இவர்களுடன் முக்கியக் கதாபாத்திரத்தில் வரும் ரித்விகா, தனது வழக்கமான பாணியிலிருந்து மாறி முற்றிலும் வித்தியாசமான நடிப்பை வெளிப்படுத்தியுள்ளார்.
மேலும், சுருக்கமான கதாபாத்திரங்களில் வரும் மூத்த நடிகர்களான நிழல்கள் ரவி மற்றும் வேல ராமமூர்த்தி ஆகியோர் தங்களது எதார்த்தமான நடிப்பால் அந்த அமானுஷ்ய கிராமத்துச் சூழலுக்கு உயிர் கொடுத்துள்ளனர்.
இசையமைப்பாளர் சக்தி பாலாஜி தனது பின்னணி இசை மற்றும் ஒலி வடிவமைப்பு (Sound Design) மூலம் த்ரில்லர் காட்சிகளுக்கான பயத்தையும், பதற்றத்தையும் தியேட்டரில் மிகச் சரியாகக் கடத்தியுள்ளார். ஒளிப்பதிவாளர் கிராமத்துத் திருவிழா சடங்குகள், மலைக்கிராமத்தின் பகல் மற்றும் இரவு நேரக் காட்சிகள் ஆகியவற்றைத் தனது கேமரா கோணங்கள் மூலம் மிக நேர்த்தியாகவும், மர்மம் நிறைந்த வண்ணங்களிலும் படம்பிடித்துள்ளார்.
மேலும், வனமங்கையின் புராணக் கதையை விவரிக்கும் கிராபிக்ஸ் அனிமேஷன் காட்சிகள் படத்தின் ஓட்டத்தைத் தடை செய்யாமல் நேர்த்தியாக வடிவமைக்கப்பட்டுள்ளன.
இயக்குனர் எஸ். பாலாஜி, பெரிய நட்சத்திரங்கள் யாரும் இல்லாத நிலையிலும் படம் முழுவதும் ஒரு மர்மமான மற்றும் விறுவிறுப்பான சூழ்நிலையைத் தக்கவைத்துக் கொண்டதில் தனது அசாத்திய சாமர்த்தியத்தை வெளிப்படுத்தியுள்ளார். புராணக் கதையையும் தற்காலக் கொலைகளையும் குழப்பமில்லாமல் இணைத்ததில் இயக்குனரின் புத்திசாலித்தனம் தெரிகிறது.கதை மற்றும் திரைக்கதையின் பலமாக அமைவது, இறுதிக்காட்சி வரை சஸ்பென்ஸை உடைக்காமல் பார்வையாளர்களைக் கட்டிப்போடும் சுவாரசியமான திரைக்கதை வடிவமைப்புதான். வெவ்வேறு காலகட்டங்களுக்குக் கதை மாறி மாறிச் சென்றாலும், எங்கும் தொய்வில்லாமல் அடுத்தடுத்து என்ன நடக்கும் என்ற எதிர்பார்ப்பை ஏற்படுத்திக் கொண்டே இருப்பது படத்தின் பெரும் பலம்.
த்ரில்லர் ரசிகர்களுக்கு ‘தி டார்க் ஹெவன்’ ஒரு சிறந்த சஸ்பென்ஸ் அனுபவத்தைத் தருகிறது.
