தன் தந்தை ஆசைப்பட்டபடி தொழிலில் இறங்கினாலும், தன் விருப்பப்படி ஆடம்பரமாகவும், பொறுப்பற்ற முறையிலும் சூதாட்டமே கதி என கிடக்கிறார் சுற்றுகிறார் பணக்கார இளைஞரான டான் ஜான் (துல்கர் சல்மான்). இதனால் பெரிய அளவில் கடன் வாங்கும் துல்கர் பணத்தை இழந்த விரக்தியில் பெட்டிங் நடத்துபவர்களை மிரட்டிப் பணத்தைப் பிடுங்கிக்கொண்டு காரில் தப்பியோடும்போது, ஒரு கோர விபத்தில் தன் பாதி வலது கையை இழக்கிறார்.
மருத்துவமனையில் அவருக்கு, ஆபரேஷன் மூலம் வேறு ஒருவரின் கை பொருத்தப்படுகிறது. அந்த மாற்றத்திற்குப் பிறகு அவனது கை அவனது கட்டுப்பாட்டை மீறி விசித்திரமாகச் செயல்படத் தொடங்குகிறது. அந்த விபத்திற்குப் பின்னணியில் உள்ள மர்மம் என்ன? அவருக்கு கொஞ்சமும் சம்பந்தம் இல்லாத கிரிக்கெட் டீம் முதலாளியான டேவிட் (மிஷ்கின்) உடன் அவருக்கு என்ன தொடர்பு? தன் கையை மீறி நடக்கும் விசித்திர நிகழ்வுகளில் இருந்து அவன் எப்படி மீண்டு வருகிறார் என்பதே இப்படத்தின் கதை.
டான் ஜான் என்ற பாத்திரத்தில் துல்கர் சல்மான் தனது ஸ்டைலான நடிப்பாலும், கச்சிதமான பாணியிலும் படத்தைத் தாங்கிப்பிடித்துள்ளார். குறிப்பாக, ஆரம்பத்தில் திமிர்பிடித்த இளைஞனாகவும், பிந்தைய காட்சிகளில் தனது கையைத் தானே கட்டுப்படுத்த முடியாமல் திணறும் தவிப்பிலும் மிகவும் இயல்பாக நடித்து அசத்தியுள்ளார்.
விக்கி கதாபாத்திரத்தில் சிறப்புத் தோற்றத்தில் வரும் ஆண்டனி வர்கீஸ் கதைக்கு நல்ல எமோஷனல் டচ கொடுத்துள்ளார்.
வில்லனாக மிஷ்கின் தனது வழக்கமான நடிப்பால் மிரட்டியுள்ளார். மேலும் கயாடு லோஹர், கதிர், சம்யுக்தா விஸ்வநாதன் மற்றும் வினய் ஃபோர்ட் உள்ளிட்டோர் தங்கள் கதாபாத்திரங்களுக்கு உரிய நியாயம் சேர்த்துள்ளனர்.
ஜேக்ஸ் பிஜாயின் பின்னணி இசை ஆக்ஷன் காட்சிகளுக்கும், திகில் தருணங்களுக்கும் உயிரோட்டத்தைக் கொடுத்துள்ளது.
ஜிம்ஷி காலிதின் ஒளிப்பதிவு படத்தின் டார்க் மற்றும் மிஸ்ட்ரி மூடைத் துல்லியமாகக் காட்டியுள்ளது.
முதல் பாதியில் எடிட்டிங் மிக வேகமாக நகர்ந்து படத்திற்குப் பலம் சேர்த்திருந்தாலும், இரண்டாம் பாதியில் சில நீளமான காட்சிகளைத் கத்தரித்திருக்கலாம்.
படத்தின் முதல் பாதி மிகவும் விறுவிறுப்பாகவும், சூதாட்டப் பின்னணியுடன் ஒரு வித்தியாசமான சூப்பர் நேச்சுரல் / ஃபேன்டசி திருப்பத்துடன் மிகச் சிறப்பாக நகர்கிறது. ஒரு அற்புதமான ஃபேன்டசி திரில்லராகத் தொடங்கும் கதை, இரண்டாம் பாதியில் வழக்கமான பழைய ஃபார்முலா மற்றும் யூகிக்கக்கூடிய பழிவாங்கும்) டிராமாவாக மாறுவது பார்வையாளர்களுக்குச் சற்று சோர்வைத் தருவதும் உண்மை. ஆனாலும் முதல் பாதி விறுவிறுப்புடனும், இரண்டாம் பாதி வழக்கமான பாதையிலும் செல்லும் ‘ஐ’ம் கேம்’ திரைப்படம் சுவாரஸ்யமான பொழுதுபோக்கு படம் என்பதில் மாற்றுக்கருத்து இல்லை.
