முத்தம் கொடுத்தால் பிரச்சனை வரும்.. ஆனால் முத்தம் கொடுப்பதை பார்த்தாலே ஒருத்தனுக்கு பிரச்சனை வருமா ? வரும் என்கிறது கிஸ் திரைப்படம்.. எப்படி ? வாங்க பார்க்கலாம்.
காதலர்கள் முத்தம் கொடுப்பதை பார்த்தாலே அந்த காதல் ஜோடிகளுக்கு எதிர்காலத்தில் என்ன நடக்கும் என்பதை தெரிந்து கொள்ளும் சக்தி ஒரு புத்தகத்தின் மூலமாக கவினுக்கு கிடைகிறது. இதனால் காதலையே வெறுக்கிறார் கவின். ஆனால் அவருக்கும் ப்ரீத்தியுடன் காதல் ஏற்படுகிறது.
எதிர்பாரத விதமாக காதலி பிரீத்தி அஸ்ரானி கவினுக்கு முத்தம் கொடுத்து விட அதன் பின் என்ன நடக்கப்போகிறது என்பதை அறிந்து கொள்ளும் கவின் அதிர்ச்சி அடைகிறார்.
அதன்பிறகு தன் காதலியை விட்டு விலக முடிவு செய்கிறார் அப்படி என்ன அதிர்ச்சி நடக்க இருந்தது ? அதையும் மீறி. இறுதியில் காதலர்கள் இருவரும் ஒன்றிணைந்தார்களா? இல்லையா என்பது தான் கிஸ் படத்தின் மீதிக்கதை.
சமீப காலமாகவே தனது கதாபாத்திரம் எதுவாக இருந்தாலும், அதில் சிறப்பாக தனது நடிப்பை வெளிப்படுத்தி வருகிறார் நாயகன் கவின்..இப்படத்திலும் அதை ஒரு சில இடங்களில் நன்றாகவே செய்திருக்கிறார். ஆனால் பல காட்சிகளில் ஏதாவது ரியாக்ஷன் கொடுத்திருக்கலாமே என்று நினைக்க வைக்கிறார்.
நாயகி ப்ரீத்தி அஸ்ராணி அழகும் இளமையும் ததும்ப நடித்து இரசிகர்களை ஈர்க்கிறார். கொடுக்கப்பட்ட அழுத்தமான வேடம்., அதை சரியாகச் செய்திருக்கிறார்.
நாயகனின் நண்பராக நடித்திருக்கும் ஆர்ஜே விஜய் மற்றும் அவரது தந்தையாக நடித்திருக்கும் விடிவி கணேஷ், காமெடி ஏரியாவை தங்கள் வசம் வைத்துக்கொண்டு பார்வையாளர்களை சிரிக்க வைத்திருக்கிறார்கள்., நாயகனின் தந்தையாக நடித்திருக்கும் தெலுங்கு நடிகர் ராவ் ரமேஷ் கதாபாத்திரத்திற்கு பொருத்தமாக நடித்திருக்கிறார். தேவயானி மற்றும் பிரபுவின் நடிப்பிலும் அனுபவம் பளிச்சிடுகிறது.
ஹரீஷ் கண்ணனின் ஒளிப்பதிவு பளிச்செனவும் வண்ணமிகுந்தும் காட்சிகளை சித்தரிக்கிறது. ஜென் மார்ட்டின் இசை, குறிப்பாக காதல் காட்சிகளில், இனிமையையும் உணர்வையும் அழகாகத் தந்துள்ளது.
தேசிய விருது பெற்ற நடன அமைப்பாளர் சதீஷ் கிருஷ்ணன் எழுதி இயக்கியுள்ளார். இனிமையான காதல் கதை. முற்றிலும் இளம் ரசிகர்களை கவரும் வகையில் தனது முதல் படத்திலேயே இளமையான ஒரு காதல் கதையினை கையில் எடுத்துக் கொண்டு அதனை ஓரளவுக்கு நிறைவாகவே கொடுத்திருக்கிறார் இயக்குனர் சதீஷ் கிருஷ்ணன்..
