படத்தின் ஆரம்பத்திலேயே காதலர்களான ஹீரோவும் (அஜய் திஷான்) ஹீரோயினும் (தனுஷா) சென்னையின் ஒரு முக்கிய சாலையில் நடுரோட்டில் நின்று சண்டையிட்டு பிரேக்அப் செய்து கொள்கிறார்கள். இந்த சண்டை வீடியோ சமூக வலைதளங்களில் வைரலாகி, அவர்கள் தமிழ்நாடு முழுவதும் பிரபலமடைகிறார்கள். இதன் பிறகு இருவரும் ஒருவரை ஒருவர் மறந்து தங்கள் வாழ்க்கையில் முன்னேற முயற்சி செய்கிறார்கள். ஆனால் அவர்களால் ஒருவரை ஒருவர் மறக்க முடிந்ததா இல்லையா என்பதே படத்தின் மீதிக்கதை.
ஹீரோ அஜய் திஷான் சில இடங்களில் விட்டேத்தியாக நடித்தாலும், ஒட்டுமொத்தமாகத் தனது கதாபாத்திரத்திற்கு நியாயம் செய்துள்ளார். அஜய் திஷன் மற்றும் ஆர்.கே. தனுஷாவின் நடிப்பு மிகவும் இயல்பாகவும், இருவருக்கும் இடையிலான கெமிஸ்ட்ரி சிறப்பாகவும் இருக்கிறது என்பதை மறுப்பதற்கில்லை.
காதலியாக வரும் தனுஷா மற்றும் இரண்டாம் பாதியில் இன்னொரு காதலியாக வரும் ஷயாரா ஆகிய இருவருமே பல காட்சிகளில் பரவாயில்லை என பாஸ்மார்க் வாங்குகிறர்கள்.: ஒரு சில இடங்களைத் தவிர்த்து, மற்ற காட்சிகளில் இவர்கள் இன்னும் சிறப்பாக நடித்திருக்கலாம் என்றே தோன்றுகிறது.
படத்தின் இரண்டாம் பாதியில் ஹீரோ தனது காதலியின் அப்பாவைப் பார்க்க பெங்களூர் சென்று வந்த காட்சியை விவரிக்கும்போது பாண்டியராஜனின் நடிப்பு அதிலும் மகன் புது வீடு வாங்கியதை பார்த்ததும் அவர் அடையும் பூரிப்பு மிகவும் பிரமாதம்.
விவேக் பிரசன்னா, லக்ஷ்மி மஞ்சு போன்ற திறமையான நடிகர்கள் படத்தில் இருந்தாலும், அவர்களது கதாபாத்திரங்கள் படத்திற்கு எந்த வலுவையும் சேர்க்கவில்லை. அவர்களை இன்னும் பயன்படுத்தி இருக்கலாம்…
விஜய் ஆண்டனியின் துள்ளலான இசை மற்றும் பாடல்கள் படத்திற்குப் கூடுதல் பலம் சேர்க்கின்றன. அவரும் போனசாக ஒரு பாடல் காட்சியில் தலைகாட்டிவிட்டு போகிறார்.
இப்படத்தின் இயக்குநர் கணேஷ் சந்திரா அவர்களே ஒளிப்பதிவாளராகவும் பணியாற்றியுள்ளதால் படத்தில் வரும் இடங்கள் மிகவும் ரம்மியமாகவும் (Pleasant locations), இன்றைய நடுத்தர வர்க்க இளைஞர்களின் வாழ்க்கையைப் பிரதிபலிக்கும் சூழல்கள் சிறப்பாகவும் படமாக்கப்பட்டுள்ளன
படத்தின் முதல் 15 நிமிடங்கள் ரசிகர்களைக் கட்டிப்போடும் வகையில் உள்ளது. வசனங்கள் வழக்கமான சினிமா பாணியில் இல்லாமல் எதார்த்தமாக எழுதப்பட்டுள்ளன. இயக்குநர் கணேஷ் சந்திரா படத்தை மிகவும் விறுவிறுப்பாகவும் டிரெண்டியாகவும் இயக்கியுள்ளார். படம் மிகவும் வேகமாக நகர்வதால், கதாபாத்திரங்களின் உணர்ச்சிகளை ரசிகர்கள் ஆழமாக உள்வாங்க போதுமான நேரம் இல்லை என்பது ஒரு குறை. இன்றைய ‘ஜெனரேஷன் இசட்’ (Gen Z) காலத்து காதல் மற்றும் அதில் உள்ள சிக்கல்களை இந்தப் படம் எதார்த்தமாகப் பேசுகிறது.
