நாயகன் நிகில் அரசு சீர்திருத்த பள்ளியில் படித்துவிட்டு ஏலகிரியில் உள்ள இமான் அண்ணாச்சிக்கு சொந்தமான ஹோட்டலில் ரூம் பாயாக வேலைக்கு சேர்கிறார். ஆனால் அவரது லட்சியம் அங்கே உள்ள மிகப்பெரிய நட்சத்திர விடுதியில் வேலைக்கு சேர வேண்டும் என்பதுதான்,. ஆனால் அங்கே வேலைக்கு சேரும் இளைஞர்களை அடிமைகளாக அடைத்து வைத்து வேலை வாங்குகிறார்கள். மேலும் அங்கே பல மர்மமான விஷயங்கள் நடைபெறுகின்றன.
இந்த நிலையில் அந்த நட்சத்திர ஹோட்டலின் மேனேஜர் திடீரென கொல்லப்படுகிறார். அவரது முதலாளி இது குறித்த மர்மத்தை விசாரிக்கும் போது, அதன் பின்னணியில் நாயகன் நிகில் இருக்கிறார் என்பது தெரிய வருகிறது.
நாயகன் நிகில் யார் ? எதற்காக இந்த விடுதிக்கு வேலைக்கு சேர்ந்து மேனேஜரை கொள்கிறார் ? முதலாளியின் கையில் சிக்கியும் கூட அவர் தப்பிக்க முயற்சி செய்யாமல் அமைதி காக்க காரணம் என்ன ? இதன் பிறகு என்ன நடந்தது என்பது மீதிக்கதை.
நாயகன் நிகிலுக்கு இது முதல் படம் என்றாலும் காதல் காட்சி, ரொமான்ஸ் என கதையை தேர்வு செய்யாமல் ஒரு விறுவிறுப்பான சமூக விழிப்புணர்வு ஏற்படுத்தக்கூடிய படம் ஒன்றில் நினைத்ததற்காக அவரை பாராட்டலாம். அவரது கதாபாத்திரம் ரொம்பவே சீரியஸானது என்பதால் அவரது முகபாவம் அதில் வெளிப்படும் நடிப்பு இந்த கதாபாத்திரத்திற்கு சரியாக அமைந்து விடுகிறது.
இமான் அண்ணாச்சி, பிர்லா போஸ் மற்றும் வில்லன் கும்பல்கள் என அனைவருமே கச்சிதமான தேர்வு தான். குறிப்பாக ஹோட்டல் மேனேஜராக வருபவர் பாலிவுட் நடிகர் போல மிரட்டுகிறார்.
நிகிலின் பின்னணியில் இருக்கும் கதை நம்மை அதிர வைக்கிறது. ஆனால் பல இடங்களில் நடக்கக்கூடிய ஒன்றுதான்.. கதாநாயகிகளாக ஒவ்வொரு காலகட்டத்திலும் நடித்துள்ள பெண்கள் மூவருமே அழகாலும் நடிப்பாலும் நம்மை வசீகரிக்கிறார்கள்.
இயக்குனர் ஜெகன் ராயன் கமர்சியல் அம்சங்களுடன் கலந்து இந்த படத்தை கொடுக்க முயற்சித்து இருக்கிறார். ரூம் பாய் ஓரளவுக்கு உங்களுக்கு சிறந்த சர்வீஸ் தர முயற்சித்து இருக்கிறார்.
