இளம் வயதிலேயே தலையில் முடி உதிர்ந்து வழுக்கைத் தலையோடு இருக்கும் நாயகன் நிஷாந்த் ரூஷோவின் வாழ்க்கைச் சிக்கல்களையும், அதில் காதல் மற்றும் திருமணத்தில் வரும் பிரச்சனைகளையும் நகைச்சுவை கலந்த முறையில் சொல்லும் படம் தான் சொட்ட சொட்ட நனையுது.
நாயகனாக நடித்திருக்கும் நிஷாந்த் ரூஷோவுக்கு இது முதல் படம். ஆனாலும் நடிப்பின் மீட்டர் தெரிந்து நடித்திருக்கிறார். அவமானம், கோபம், ஏமாற்றம், வெறுப்பு என எல்லா ரசங்களையும் கொட்டும் திறமை உள்ளவராக இருக்கிறார்…
பிரியா என்ற கதாபாத்திரத்தில் நடித்திருக்கும் நடிகை ஷாலினி, சுருதி என்ற கதாபாத்திரத்தில் நடித்திருக்கும் வர்ஷினி, மற்றும் திரையில் தோன்றும் பெரும்பாலான சின்னத்திரை நட்சத்திரங்கள் ரசிகர்களை சிரிக்க வைக்க கடுமையாக பிரயத்தனம் செய்கிறார்கள்.
ரோபோ சங்கர், புகழ், கேபிஒய் ராஜா, கேபிஒய் யோகி, கேபிஒய் வினோத் ஆகிய அனைவரும் எந்த குறையுமின்றி தங்களது கதாபாத்திரத்தை பூர்த்தி செய்திருக்கிறார்கள்.
இசையமைப்பாளர் ரெஞ்சித் உன்னி இசையில் பாடல்கள் அனைத்தும் கேட்கும்படி இருக்கிறது. பின்னணி இசை காட்சிகளுக்கு ஏற்ப பயணித்திருக்கிறது..
ஒளிப்பதிவாளர் ரயீஷ், காரைக்குடியை பருந்து பார்வையில் காட்டிவிட்டு, பெரும்பாலான காட்சிகளை ஒரே வீட்டுக்குள் வைத்தே படமாக்கியிருக்கிறார்.
வித்தியாசமான பிரச்சனையை எடுத்துக்கொண்டு முடிந்தவரை அதற்கு நியாயம் சேர்த்து இருக்கிறார் இயக்குநர் நவீத் எஸ்.ஃபரீத். இப்போதைய தொழில் நுட்ப யுகத்தில் தலைமுடி தொட்டுவது பெரும்பாலான இளைஞர்களின் பிரச்சினையாக உள்ளது. அந்த வகையில் வழுக்கையை மையமாக கொண்டு புதிய கோணத்தில் நகைச்சுவை கலந்து இதயபூர்வமான காதலை உணர்த்தி மென்மையான பொழுதுபோக்கு அம்சங்கள் நிறைந்த படமாக கொடுத்திருக்கிறார்
