இலங்கையின் பொருளாதார சூழ்நிலை பிரச்சனையால் விலைவாசி அதிகரிக்க, அங்கு வாழ முடியாமல் சட்டத்திற்கு புறம்பாக ஒரு படகில் ஏறி தன்னுடைய குடும்பத்துடன் சசிகுமாரும் அவருடைய மனைவிசிம்ரன் இரண்டு பையன்களுடன் அகதிகளாக ராமேஸ்வரம் வருகின்றனர். அதன்பிறகு அங்கிருந்து சென்னையில் குடியேறி வசிக்க தொடங்குகிறார்கள்.
இதற்கிடையே, சசிகுமாரின் குடும்பம் ராமேஸ்வரத்திற்கு வந்த அதே நாளில் அங்கு குண்டு வெடிப்பு சம்பவம் ஒன்று நடக்க, இதற்கும் சசிகுமாரின் குடும்பத்திற்கும் தொடர்பு இருப்பதாக நம்பும் காவல்துறை, அந்த குடும்பத்தை பிடித்து வழக்கை முடிப்பதற்கான முயற்சியில் ஈடுபடுகிறது. இதிலிருந்து சசிகுமாரால் தப்பித்து வெளிவர முடிந்ததா என்பது மீதிக்கதை.
அயோத்தி படத்திற்கு பிறகு சசிகுமாரின் பண்பட்ட நடிப்பை இதிலும் பார்க்க முடிகிறது. முழுக்க முழுக்க இலங்கைத் தமிழை, முழுமையாக பேசவில்லை என்றாலும் ஒரு சராசரி மனிதனுடைய ஆசை, ஆதங்கம், மனிதாபிமானம் மனித நேயம் அனைத்தையும் மிக அழகாக தன்னுடைய நடிப்பின் மூலம் இயல்பா வெளிப்படுத்தி இருக்கிறார்.
வசந்தி கதாபாத்திரத்தில் நடித்துள்ள சிம்ரனுக்கு பெரிய வேலை இல்லை. அதேசமயம் நடிப்பிலும் குறை இல்லை. சசிகுமாருக்கு ஜோடியாக மிகவும் பொருத்தமாக பொருந்தியிருக்கிறார்.
நீண்ட காலம் கழித்து யோகி பாபு நகைச்சுவையில் நாம் சிரிக்க முடிகிறது. ஆனால் அவரும் ஒரு சில காட்சிகளிலேயே காணாமல் போய்விடுகிறார். இளங்கோ குமரவேல் மற்றும் ஸ்ரீஜா ரவி இருவருக்குமிடையே இருக்கும் காதல் படம் பார்ப்பவர்களை கண்கலங்க வைக்கிறது. ரமேஷ் திலக்கிற்கு சொல்லிக்கொள்ளும்படியான கதாபாத்திரம். நிறைவாக செய்திருக்கிறார்…
.
வாழ்வின் மீது நம்பிக்கை இழந்து விரக்தியும் கோபமும் நிறைந்த இளைஞராகக் காட்டப்படும் மிதுன் ஜெய் சங்கர் நன்றாகவே ஸ்கோர் செய்கிறார்.. சிறுவன் கமலேஷின் நடிப்பு, தியேட்டரையே வாய்விட்டு சிரிக்க வைக்கிறது..
ஷான் ரோல்டன் இசையில் பாடல்களும், பின்னணி இசையும் படத்திற்கு பலம் சேர்க்கும் வகையில் பயணித்திருக்கிறது. அரவிந்த விஸ்வநாதன் ஒளிப்பதிவு மேடை நாடகத்தை பிரதிபலிக்கும் வகையில் அமைந்திருக்கிறது.
ஈழத் தமிழர்களின் அவல நிலையை கதைக்கருவாக வைத்துக் கொண்டு திரைக்கதை அமைத்தாலும், அதை நகைச்சுவையாக சொல்ல முயற்சித்திருக்கிறார் இயக்குநர் அபிஷன் ஜீவிந். காமெடி மட்டுமல்ல, அன்பு, மனிதம் என மூன்றையும் வைத்து சரியான ஒரு திரைக்கதை அமைத்து தரமான படைப்பாக இப்படத்தைக் கொடுத்திருக்கிறார் இயக்குனர்.
டூரிஸ்ட் ஃபேமிலி – குடும்பத்துடன் பார்க்க வேண்டிய படம் .
