படவா கோபியின் மகள் தேவிகா.. படிப்பு, எதிர்காலம் என எல்லாமே தந்தையின் விருப்பத்திற்கு ஏற்ப செயல்படுபவர். அவருக்கு ஏற்ற மணமகனை பெண் பார்க்க வரச்சொல்கிறார் படவா கோபி. பெண் பார்க்க வந்த மாப்பிள்ளை விட்டார் அவரது மகளுக்கு ஏற்கனவே திருமணமாகி விட்டது என்றும் அவர்கள் வெளிநாட்டிற்கு தேன் நிலவு வந்த போது பார்த்தோம் என்றும் குண்டை தூக்கி போடுகிறார்கள்.
தனக்கே தெரியாமல் எப்படி கல்யாணம் நடந்திருக்கும் என குழம்பும் தேவிகா தந்தையிடம் தன்னை குற்றமற்றவள் என நிரூபிப்பதாக கால அவகாசம் கேட்கிறார். தன்னுடன் திருமணம் ஆனதாக சொல்லப்படும் யூடியூப் சேனல் நடத்தும் தேவ் என்பவரை தேடி கண்டுபிடித்து இது பற்றி கேட்க, அவரும் தனக்கு திருமணம் ஆகி விட்டதா என்று ஷாக் ஆகிறார்.
ஏற்கனவே திருமணம் ஆகி இருந்தாலும் பரவாயில்லை அந்த பெண்ணை நான் திருமணம் செய்து கொள்கிறேன் என பிடிவாதமாக நிற்கும் மாப்பிள்ளை விஜே நிக்கி ஒரு வழக்கறிஞர் மூலமாக இவர்களுக்கு திருமணம் நடந்ததை நிரூபிக்கிறார். அதன் பிறகு அவர்களுக்கு விவாகரத்து பெற்று தரவும் முயற்சிக்கிறார்.
எப்படி நாயகன், நாயகி இருவருக்குமே அவர்களை அறியாமல் திருமணம் நடைபெற்றது ? இதன் பின்னணியில் இருக்கும் குழப்பம் என்ன ? அவர்களால் இந்த குழப்பத்தில் இருந்து விடுபட முடிந்ததா ? இதை விடுவிக்க செய்யும் முயற்சியில் இவர்கள் இருவருக்கும் இடையே என்ன நடந்தது என்பது போன்ற சுவாரசிய சம்பவங்களுடன் மீதி கதை தொடர்கிறது.
முதல் படமாக இருந்தாலும் தேவ் மற்றும் தேவிகா இயல்பான நடிப்பைக் காட்டுகிறார்கள். அவர்கள் இருவருக்குமே காதல் இல்லாத ஒரு காதல் உருவாவது அழகு. தேவின் அப்பாவித்தனமான முகம் அவருக்கு கை கொடுக்கிறது. நாயகி தேவிகா பார்த்ததுமே காதல் கொள்ள வைக்கும் அழகில் வசீகரிக்கிறார்.
தேவிகாவின் தந்தையாக படவா கோபி தேர்ந்த நடிப்பில் ஸ்கோர் செய்கிறார். மாப்பிள்ளையாக ஒவர் ஆக்டிங்கில் விஜே நிக்கி இவர்களுடன் ஆகாஷ் பிரேம்குமார், ஸ்வாதி நாயர், பூஜா, கிரி துவாரகிஷ், யுவராஜ் கணேசன் உள்ளிட்ட பிற வேடங்களில் நடித்திருப்பவர்கள் பொருத்தமான தேர்வு.
சகிஷ்மா சேவியன் இசையில் பாடல்களும், பின்னணி இசையும் படத்திற்கு பலம் சேர்த்திருக்கிறது. சூராஜ் நல்லுசாமியின் ஒளிப்பதிவில் படம் முழுவதும் கலர்புல்லாக பயணிக்கிறது.
காதல் இல்லாத ஒரு காதல் கதையை கொஞ்சம் ஜாலியாக எதிர்பாராத ட்விஸ்ட் ஆக ஹாரர் பிளாஸ்பேக் கலந்து கொடுத்திருக்கிறார் இயக்குனர் சாம்.எஸ். அதை இன்னும் கொஞ்சம் சுவாரஸ்யமாக கொடுத்திருக்கலாம்.
