சர்வதேச போதைப்பொருள் கடத்தல் நெட்வொர்க் மற்றும் அதற்குப் பின்னால் இருக்கும் சட்ட அமலாக்கத் துறையின் விசாரணையை மையமாகக் கொண்ட ஒரு க்ரைம் திரைப்படமாக இது உருவாகியுள்ளது.
குடும்பத்தின் கடுமையான நிதி நெருக்கடி மற்றும் சூழ்நிலை காரணமாக, சுங்கத்துறை அலுவலகத்தில் சாதாரண வேலை பார்க்கும் அமர் என்ற நடுத்தர வர்க்க இளைஞன், 25,000 கோடி ரூபாய் மதிப்புள்ள 3000 கிலோ ஹெராயின் கடத்தல் கும்பலின் சட்டவிரோதப் பின்னணியில் வேறு வழியின்றி சிக்கிக்கொள்கிறார். சர்வதேச கடத்தல் கும்பலைச் சேர்ந்த ஒரு முக்கிய புள்ளியும், உள்ளூர் வில்லனும் இணைந்து நடத்தும் இந்த மாபெரும் கடத்தல் திட்டத்தில் அமர் எப்படி இணைகிறார், அதன் பிறகு அவரது வாழ்க்கையில் ஏற்படும் திருப்பங்கள் மற்றும் சட்டத்தின் பிடியில் இருந்து அவன் எப்படித் தப்பிக்கிறார் என்பதே மீதிக்கதை.
படத்தின் நாயகனான அமர் பாத்திரத்தில் சரண் சக்தி நடித்துள்ளார். ஒரு சாதாரண நடுத்தர வர்க்க இளைஞன் சூழ்நிலை காரணமாகத் தவறான பாதைக்குத் தள்ளப்படும் பாத்திரத்தில் அவர் ஓரளவிற்குப் பங்களிப்பைத் தந்துள்ளார்.
நாயகியாக பவித்ரா என்ற பாத்திரத்தில் ஸ்மேகா நடித்துள்ளார். ஆனால் கதையின் நாயகன் கடுமையான மன உளைச்சலில் இருக்கும்போது, நாயகியுடன் சாலையில் பார்த்த உடனே காதலில் விழுந்து மரத்தைச் சுற்றி டூயட் பாடுவது போன்ற காட்சிகள் தற்கால நவீன ரசிகர்களுக்குச் சிறிதும் ஒட்டாத ஒன்றாக அமைந்து அவரது பங்களிப்பைக் குறைத்துள்ளது.
அமரின் அம்மாவாக வரும் நடிகை ராதிகா சரத்குமார், தனது மகனின் தவறான செயல்களுக்குப் பின்னால் இருக்கும் குடும்பப் பாசப் பிணைப்பை வெளிப்படுத்தும் பாத்திரத்தில் தேவையான கனத்தை கொடுத்துள்ளார்.
கடத்தல் உலகின் கிங்பின்னான லிங்கம் என்ற வில்லன் பாத்திரத்தில் ஜே.டி. சக்ரவர்த்தியும், சர்வதேச கடத்தல் கும்பலின் தலைவனான காதர் பாய் பாத்திரத்தில் லாலும் நடித்துள்ளனர். ஜே.டி. சக்ரவர்த்திக்கு ஒரு பிரம்மாண்டமான ‘மாஸ்’ என்ட்ரியும் சண்டைக் காட்சியும் கொடுக்கப்பட்டு வில்லத்தனத்தைக் காட்ட முயன்றாலும், அவை 2000-களின் வழக்கமான மசாலா படங்களின் பாணியிலேயே அமைந்துவிட்டது.
இவர்களுடன் இணைந்து முக்கிய குணச்சித்திரப் பாத்திரங்களில் பாலசரவணன், காளி வெங்கட், ஜாபர் சாதிக் மற்றும் மைம் கோபி ஆகியோர் தங்களுக்குக் கொடுக்கப்பட்ட பாத்திரங்களில் தேவையான பங்களிப்பை வழங்கியுள்ளனர்
ஒளிப்பதிவாளர் கவின் பாஸ்கர் துறைமுகம் மற்றும் கடத்தல் உலகிற்குத் தேவையான காட்சிகளை மிக நேர்த்தியாக தனது கேமராவில் பதிவு செய்துள்ளார். இசையமைப்பாளர் சாம் டேனியல் பாடல்கள் மூலம் கவனம் ஈர்க்க முயற்சிக்க, இன்னொரு பக்கம் படத்தின் பின்னணி இசையை இயக்குனர் டி. சமய முரளியே கவனித்துக் கொண்டுள்ளார். இருப்பினும் 2000-களின் பழமையான மசாலா பட பாணியில் சண்டைக் காட்சிகளைத் தொடர்ந்து வரும் ஐட்டம் சாங் போன்ற விஷயங்கள் தொழில்நுட்ப ரீதியாகவும் திரைக்கதை ரீதியாகவும் படத்திற்குப் பெரிய பலவீனமாக மாறியுள்ளன.
முன்னாள் ஐ.ஆர்.எஸ் (IRS) அதிகாரியான இயக்குனர் டி. சமய முரளி, தனது சொந்த அதிகாரப்பூர்வ அனுபவப் பின்னணியைக் கொண்டு சுங்கத்துறை அமலாக்கப் பிரிவின் உண்மையான செயல்பாடுகளைக் காட்ட முயன்றது படத்தின் ஆரம்பத்தில் ஒரு பிளஸ் பாயிண்டாக அமைந்துள்ளது. ஆனால், அவர் வணிக ரீதியாகப் படத்தை ஜெயிக்க வைக்க வேண்டும் என்பதற்காகப் படத்தில் சேர்த்த தேவையற்ற மசாலாவை சேர்த்தது மற்றும் யூகிக்கக் கூடிய சம்பவங்கள் திரைக்கதையின் பிளஸ்சை விட மைனஸாக மாறியுள்ளன.
படத்தின் இரண்டாம் பாதியில் டிசி முரளி கிருஷ்ணா என்ற போலீஸ் அதிகாரியாக இயக்குனரே நேரடியாக ஒரு ‘மாஸ்’ சண்டைக் காட்சியுடன் என்ட்ரி கொடுத்து நடிப்பில் கவனம் செலுத்த முயன்றது, கதையின் ஓட்டத்திற்குப் பெரிய அளவில் உதவவில்லை. ஒரு நல்ல அழுத்தமான போதைப்பொருள் கடத்தல் பின்னணியைக் கொண்டிருந்தாலும் நவீன த்ரில்லர் மற்றும் யதார்த்தமான க்ரைம் கதைகளைத் தேடும் இன்றைய ரசிகர்களுக்கு இந்த பழைய பாணி கதை சொல்லல் பெரிய ஏமாற்றத்தையே தரும்.
,
