கல்லூரியில் இருந்து இடைநீக்கம் செய்யப்பட்ட வானியற்பியல் மாணவர் கிஷ் (திராவிட் செல்வம்) மற்றும் அவரது நண்பர்களான ரஷ் (அஞ்சலி நாயர்), டஷ் (ஆர்.ஜே.தீபக்) ஆகியோர் பத்மநாபன் (குரைஷி) என்ற விஞ்ஞானியின் பூட்டப்பட்ட “பிளாக் ஹோல்” வீட்டிற்குள் தஞ்சம் அடைகிறார்கள். அங்குள்ள ‘சம்பங்கி’ என்ற ட்ரோனை கிஷ் தன் கட்டுப்பாட்டுக்குள் கொண்டுவந்து, அதன் கேமரா மூலம் பக்கத்து வீட்டில் வசிக்கும் அழகான மினியேச்சர் ஆர்ட்டிஸ்டான பிரகிருதி (சித்தி இத்னானி) என்ற பெண்ணைக் கண்டு காதலில் விழுகிறான்.
ஆனால், அவள் வசிக்கும் வீட்டில் உள்ள ஒரு சூனியக்காரி (தேவதர்ஷினி) ஆண்களை பொம்மைகளாக மாற்றி சிறைபிடிக்கும் விசித்திரமான ஆபத்து நிறைந்த உலகம் இருப்பதை அவர்கள் எதிர்கொள்கிறார்கள்.. இதன்பின் நடப்பது மீதிக்கதை.
திராவிட் செல்வம், அஞ்சலி நாயர் மற்றும் ஆர்.ஜே.தீபக் ஆகிய மூவரும் ஒரு ரசிக்கத்தக்க கூட்டணியாக இணைந்து நடித்துள்ளனர். அவர்களில் அஞ்சலி நாயர் மற்றும் ஆர்.ஜே.தீபக் ஆகியோருக்கு அதிக பஞ்ச் வசனங்கள் மற்றும் நகைச்சுவை தருணங்கள் கிடைத்துள்ளன,
மேலும் அஞ்சலி நாயர் படத்தின் ஒரு தீவிரமான திருப்பத்தை தனது அழுத்தமான நடிப்பால் மிகச் சிறப்பாக கையாண்டுள்ளார். சித்தி இத்னானி அழகாகவும் தேவதையாகவும் காட்சியளிக்க வேண்டிய தனது கதாபாத்திரத்திற்கு தேவையானதை சரியாகச் செய்துள்ளார்.
தேவதர்ஷினி மிரட்டலாகவும் அதே சமயம் வேடிக்கையாகவும் நடித்து ரசிக்க வைக்கிறார், குரைஷியின் விசித்திரமான விஞ்ஞானி கதாபாத்திரம் சில இடங்களில் நன்றாக ஒர்க்அவுட் ஆகியுள்ளது.
40 வயது பேச்சுலராக வரும் இன்ஸ்பெக்டர் கதாபாத்திரத்தில் சினிமா வாலா சதீஷ் தனது சிறப்பான நடிப்பால் பார்வையாளர்களை வெகுவாகக் கவர்ந்துள்ளார்.
இரண்டு வீடுகள் மற்றும் அதற்கு இடைப்பட்ட சாலைகளை மட்டுமே பயன்படுத்தி, எவ்வித குறையும் தெரியாதவாறு ஒரு சுமாரான பட்ஜெட்டில் நேர்த்தியாகப் படத்தை உருவாக்கியிருப்பது படத்தின் பலமாகும். ஆரம்பத்தில் விசித்திரமான கதாபாத்திரங்களை அறிமுகப்படுத்திவிட்டு கதையை நகர்த்த முடியாமல் ஒரு குழப்பமான நிலைக்குள் படம் தள்ளப்படுகிறது. மேலும், சிறுவர்களைக் கவரும் வகையிலான மொக்கையான நகைச்சுவை ஜோக்குகளும், படம் எவ்வளவு புத்திசாலித்தனமாக இருக்கிறது என்று காட்டிக் கொள்ளும் சில காட்சிகளும் கதையின் வேகத்தைக் குறைக்கும் பலவீனங்களாக அமைந்துள்ளன. விசித்திரமான சூழ்நிலைகளுக்குள் கதையை கொண்டு சென்று சிக்கிக் கொண்டாலும், இறுதிக் காட்சிகளில் அதிலிருந்து மிகச் சாமர்த்தியமாக மீண்டு வந்து படத்தை முழுமையாகக் கோர்த்து சில நகைச்சுவைக் காட்சிகளைப் படத்தின் முக்கிய திருப்புமுனையாக மாற்றியதில் இயக்குனர் ராகவ் மிர்தாத்தின் திறமை வெளிப்படுகிறது
