கிராமப்புற பின்னணியில் வாழும் செல்வி என்ற பெண், தனது இரு மகன்களையும் வளர்ப்பதற்காக தனது வாழ்க்கை ஆசைகளையே தியாகம் செய்கிறார். ஆண்டுகள் கடந்த பிறகு, அவருடைய வாழ்க்கைக்கு மீண்டும் ஒரு புதிய அர்த்தம் கிடைக்க வேண்டுமென்ற எண்ணம் உருவாகிறது. ஆனால் குடும்பம், உறவினர்கள் மற்றும் சமூகத்தின் எதிர்ப்புகள் அவரை சோதிக்கின்றன. அந்த சூழலில் ஒரு பெண்ணின் தனிப்பட்ட விருப்பம் வெற்றிபெறுகிறதா என்பதையே படம் உணர்வுபூர்வமாக பேசுகிறது.
விஜய் ஆண்டனி வழக்கமான ஹீரோ பாணியை தவிர்த்து அமைதியான கதாபாத்திரத்தில் தோன்றி கதைக்கு தேவையான ஆதாரமாக இருக்கிறார்.
கதையின் உணர்ச்சி அம்சங்களை தாங்கிச் செல்லும் முக்கியமான கதாபாத்திரத்தில் நடித்துள்ள சுவாசிகா, பல காட்சிகளில் தனது இயல்பான நடிப்பால் பார்வையாளர்களின் கவனத்தை ஈர்க்கிறார். குறிப்பாக குடும்ப பாசம் மற்றும் மனவேதனைகளை வெளிப்படுத்தும் காட்சிகளில் அவரது நடிப்பு குறிப்பிடத்தக்கதாக இருக்கிறது.
மகன்களாக நடித்துள்ள அஜய் திஷன் மற்றும் சக்தி ஆகியோர் தங்களது கதாபாத்திரங்களுக்கு ஏற்ப நம்பகமான நடிப்பை வழங்கியுள்ளனர்.
கருணாஸ் அனுபவமிக்க கலைஞராக தனது பாத்திரத்திற்கு உயிர் கொடுத்திருக்கிறார். பாலாஜி சக்திவேல் தனது தனித்துவமான நடிப்பின் மூலம் பல காட்சிகளில் தாக்கத்தை ஏற்படுத்துகிறார். இவர்களுடன் இணைந்து நடித்துள்ள துணை நடிகர்களும் கதையின் இயல்பை குலைக்காமல் தங்களது பங்களிப்பை வழங்கியுள்ளனர்.
எஸ்.பி. தர்ஷன் கிர்லோஷின் ஒளிப்பதிவு படத்தின் மிகப்பெரிய பலங்களில் ஒன்றாக அமைந்துள்ளது. இயற்கை சூழல்களையும், குடும்ப உணர்வுகளையும் அழகாக பதிவு செய்திருக்கும் கேமரா காட்சிகள் படத்தின் தரத்தை உயர்த்துகின்றன. பாலாஜி ஸ்ரீராமின் இசை மற்றும் பின்னணி இசை கதையின் உணர்வுகளை மேலும் வலுப்படுத்துகின்றன. குறிப்பாக எமோஷனல் காட்சிகளில் இசை தனி தாக்கத்தை ஏற்படுத்துகிறது
இயக்குநர் சசி, குடும்ப உறவுகளின் முக்கியத்துவத்தையும் மனிதர்களின் மனநிலைகளையும் மிகைப்படுத்தாமல் இயல்பாக சொல்ல முயற்சித்திருக்கிறார். கதையின் மையக் கருத்தை வணிக அம்சங்களுக்காக சமரசம் செய்யாமல் எடுத்துச் சென்றிருப்பது பாராட்டுக்குரியது. இருப்பினும் சில காட்சிகளில் திரைக்கதை சற்று மெதுவாக நகர்வது படத்தின் வேகத்தை பாதிக்கிறது.
சில இடங்களில் உணர்ச்சி காட்சிகள் அதிகமாக இழுக்கப்படுவது போல தோன்றுகிறது. குறிப்பாக இறுதிக்கட்டத்தில் வரும் சில சம்பவங்கள் சற்று செயற்கையாகவும் நீளமாகவும் உணரப்படுகின்றன. சுவாசிகாவின் சிறப்பான நடிப்பு, சசியின் நேர்மையான இயக்கம் மற்றும் சமூக கருத்து ஆகியவை படத்தை கவனிக்கத்தக்க படைப்பாக மாற்றுகின்றன. சில திரைக்கதை தடுமாற்றங்கள் இருந்தாலும், குடும்ப உறவுகள் மற்றும் மனித உணர்வுகளை விரும்பும் ரசிகர்களுக்கு இந்த படம் ஒரு நல்ல அனுபவமாக அமையும்
