இந்த தொடரின் மையக் கதாபாத்திரம் கோட்டை கருப்பசாமி என்ற சாதாரண போலீஸ் கான்ஸ்டபிள் (பிரசாந்த் பாண்டியராஜ்). பெரிய “மாஸ் ஹீரோ” மாதிரி இல்லாமல், போலீஸ் அமைப்புக்குள் மரியாதை கிடைக்க போராடும் ஒரு மனிதனாக இருக்கிறார். கருப்பசாமி. வேலை பார்க்கும் போலீஸ் ஸ்டேஷனில் மேலதிகாரிகள் ஒவ்வொருவரும் தனித்தனியான நோக்கத்துடன் செயல்படுகிறார்கள். சிலர் உண்மையை கண்டுபிடிக்க விரும்புகிறார்கள். சிலர் அரசியல்வாதிகளின் அழுத்தத்தில் இருக்கிறார்கள். இன்னும் சிலர் தங்களது பதவி பாதுகாப்புக்காக மட்டுமே வேலை செய்கிறார்கள். இந்த சூழலில் கருப்பசாமி சிக்கிக்கொள்கிறார்.
போலீஸ் துறையில் உள்ள அழுத்தம், அதிகார அரசியல், கீழ் நிலை ஊழியர்களின் அவமானங்கள், விசாரணைகளின் மன அழுத்தம் ஆகியவற்றை மையமாக வைத்து கதை நகர்கிறது. ஒரு நாள் ஒரு முக்கியமான குற்றவாளியை கைது செய்யும் சம்பவம் நடக்கிறது. அந்த கைது சம்பவத்துக்குப் பிறகு ஒரு பெரிய அரசியல் மற்றும் போலீஸ் அழுத்தம் உருவாகிறது. இதிலிருந்து கதை ஆரம்பமாகிறது.
கருப்பசாமி உண்மையை வெளிக்கொணர முயற்சிக்கும்போது அவர்மேலேயே சந்தேகம் திரும்புகிறது. இதனால் அவர் டிபார்ட்மென்ட்டு-க்குள்ளேயே தனிமைப்படுகிறார். மேலும் அதற்காக அவர் பெரிய தியாகங்களை செய்ய வேண்டிய சூழல் வருகிறது. இறுதியில் தான் நினைத்ததை சாதிக்க அவரால் முடிந்ததா ?
சாதாரணமாக தமிழ் த்ரில்லர்களில் வரும் அதிரடி, பஞ்ச் டயலாக் ஓவர் ஹீரோயிசம் ஆகியவை இதில் மிகக் குறைவு. அதற்கு பதிலாக மிகவும் ரியலிஸ்டிக் ஆன போலீஸ் ஸ்டோரிடெல்லிங்கை இயக்குநர் தேர்வு செய்துள்ளார் இயக்குநர் விக்னேஷ் நடராஜன் கதையை மெதுவாக பில்ட் அப் செய்கிறார். முதல் இரண்டு எபிசோட்களில் கதாபாத்திரங்களையும் போலீஸ் நிலையத்தின் சூழலையும் உணர்வதற்கே அதிக நேரம் செலவிடப்படுகிறது.
கருப்பசாமியாக நடித்துள்ள பிரசாந்த் பாண்டியராஜ் மிகவும் இயல்பான நடிப்பை வழங்கியிருக்கிறார். வழக்கமான கதாநாயகன் போல காட்சியளிக்காமல், சாதாரண மனிதனாகவே திரையில் தோன்றுகிறார். அவரது முகபாவனைகள், பயம் கலந்த உடல் மொழி, உள்ளுக்குள் வெடிக்கும் கோபத்தை அடக்கிக்கொள்ளும் தருணங்கள் எல்லாம் மிகவும் நம்பகமாக இருக்கின்றன. குறிப்பாக அவமானப்படுத்தப்படும் காட்சிகளிலும், மன அழுத்தத்தால் உடைந்து போகும் தருணங்களிலும் அவர் நடித்த விதம் பாராட்டத்தக்கது.
துணை நடிகர்களும் கதைக்கு பெரிய பலமாக உள்ளனர். பாலாஜி சக்திவேல், அருள்தாஸ், காளி வெங்கட் போன்றவர்கள் தங்களது கதாபாத்திரங்களை மிக இயல்பாக செய்திருக்கிறார்கள். யாரும் சினிமாத்தனமாக தெரியாமல் நிஜ வாழ்க்கை மனிதர்களைப் போலவே தோன்றுகின்றனர். கதாநாயகிகள் உள்ளிட்ட அனைவரது நடிப்பும் பிளஸ் தான்.
அசோக் குமாரின் ஒளிப்பதிவும் சாம்.சி.எஸ்ஸின் பின்னணி இசையும் தொடரின் மனநிலையை மேலும் வலுப்படுத்துகின்றன. இருண்ட போலீஸ் ஸ்டேஷன்கள், சுருங்கிய அறைகள், அழுத்தமான விசாரணை காட்சிகள் அனைத்தும் ஒரு நெருக்கடியான உணர்வை உருவாக்குகின்றன. சாம் சி.எஸ். இசை அதிக சத்தமில்லாமல் மெதுவாக பதட்டத்தை உருவாக்குகிறது.
மொத்தத்தில் “வாரண்ட்” ஒரு வித்தியாசமான போலீஸ் டிராமா. காவல்துறையின் உள்ளேயுள்ள மன அழுத்தங்களையும் மனித மன மாற்றங்களையும் உண்மைத்தன்மையுடன் காட்டும் இந்த தொடர், மெதுவான ஆனால் தாக்கம் உள்ள கதைகளை விரும்பும் பார்வையாளர்களுக்கு நல்ல அனுபவமாக இருக்கும்.
தமிழ் ஓடிடி உலகில் சமீப காலமாக யதார்த்தமான குற்றப் பின்னணிக் கதைகள் அதிக வரவேற்பைப் பெற்று வருகின்றன. அந்த வரிசையில் வெளியாகியுள்ள “வாரண்ட்” வெப் சீரிஸ் காவல்துறையின் உள்ளேயுள்ள உண்மையான சூழலை மிகவும் நேர்மையாக பதிவு செய்திருக்கும் ஒரு படைப்பு என்றே சொல்லலாம்.
